![](/3/images/news/2022/02/2022-02-04-trokeli_matki_6.jpg)
29 студзеня ў санктуарыі Гродзенскай дыяцэзіі Маці Божай Каралевы нашых сем’яў у Тракелях прайшла дыяцэзіяльная сустрэча малітоўнага руху «Маці ў малітве».
Як паведаміла Прэс-служба Гродзенскай дыяцэзіі, на сустрэчу з розных мясцін сабраліся жанчыны, якіх яднае малітва за сваіх дзяцей і любоў да Найсвяцейшай Панны Марыі.
Сустрэча пачалася ў Марыйным садзе, дзе маці разам з Марыяй прайшлі Крыжовы шлях, разважаючы над таямніцай мукі Езуса. Удзельніцы прасілі, каб іх сэрцы напоўніліся жалем за грахі і ўдзячнасцю за Яго любоў.
Пасля малітвы жанчын чакаў супольны абед. Нефармальная атмасфера спрыяла новым знаёмствам і цікавым гутаркам.
Радасць сустрэчы падзяліў з матулямі кусташ санктуарыя ксёндз доктар Юрый Бяганскі, які цэлебраваў святую Імшу, маліўся ў інтэнцыі ўсіх маці і за іх дзяцей, а таксама дзякаваў Богу за такую патрэбную малітоўную супольнасць.
У гаміліі святар падкрэсліў, што кожная супольнасць у Касцёле ўзнікае з натхнення Духа Святога.
«Менавіта Дух Святы аб’яднаў вашыя сэрцы, каб трываць супольна ў малітве», — дадаў ксёндз Бяганскі.
Ён адзначыў, што кожная маці павінна быць прыкладам для сваіх дзяцей, удзельнічаць у жыцці Касцёла, быць гатовай абараніць веру, заўсёды быць вернай Хрысту і Яго запаведзям.
Кусташ тракельскага санктуарыя заахвоціў больш пазнаваць Бога, пацвярджаць сваю веру добрымі ўчынкамі, рэгулярна яднацца з Панам у святой Камуніі, запрашаць Найсвяцейшую Панну Марыю на штодзённую малітву.
Пасля Імшы адбылася адарацыя Найсвяцейшага Сакрамэнту.
На заканчэнне сустрэчы ксёндз Юрый Бяганскі запрасіў удзельніц руху «Маці ў малітве» ў пешую пілігрымку ў Тракелі з Ліды, якая пройдзе ў першую нядзелю мая.
Менавіта ў гэты дзень у Гродзенскай дыяцэзіі адзначаецца Дзень Маці.
Сустрэча была напоўнена для сабраных праслаўленнем Пана, знаёмствам з новымі людзьмі і са святым месцам, дзе знайшла свой дом Маці Божая.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)