22 студзеня, у межах Тыдня малітваў аб адзінстве хрысціянаў, моладзь мінскай катэдральнай парафіі Найсвяцейшага Імя Марыі наведала сваіх праваслаўных аднагодкаў з прыхода Усіх Святых у Мінску.
Сустрэча дзвюх моладзевых супольнасцяў адбылася ў сценах храма-помніка, дзе каталіцкая моладзь мела магчымасць наведаць крыпту і пастаянную экспазіцыю «Музей памяці».
Пасля экскурсіі у маладых католікаў была магчымасць пазнаёміцца і паразмаўляць з удзельнікамі моладзевага руху «Агіёс».
Кіраўнік гэтага руху праваслаўнай моладзі Мікалай Камарчук распавёў гасцям пра дзейнасць праваславаўнай моладзевай арганізацыі. Адказны за моладзь архікатэдральнай парафіі ксёндз Андрэй Бурак у сваю чаргу расказаў пра тое, як дзейнічае моладзевае душпастырства пры катэдры.
У размове юнакі і дзяўчаты дзяліліся сваімі традыцыямі, распавядалі пра тое, як праводзяць час разам. Праваслаўная і каталіцкая моладзь падзялілася планамі на будучыню і абмеркавала далейшыя магчымыя сумесныя мерапрыемствы.
У шчырым дыялогу маладыя людзі задавалі адзін аднаму пытанні, якія іх цікавілі, адносна каталіцкіх і праваслаўных традыцый, літургіі і звычаяў, размаўлялі пра тое, што аб’ядноўвае хрысціянаў усходу і захаду; параўноўвалі, у чым яны падобныя, і што іх адрознівае.
Заключным момантам сустрэчы стала знаёмства і размова з ключаром храма Усіх Святых протаіерэем Фёдарам Поўным. Святар распавёў удзельнікам сустрэчы гісторыю свайго паклікання, а таксама пра ідэю стварэння храма-помніка. Ён звярнуў асаблівую ўвагу на значэнне Божага Слова ў жыцці маладога верніка.
«Малітва — гэта размова чалавека з Богам, а Святое Пісанне — гэта размова Бога з намі», — падкрэсліў айцец протаіерэй. Менавіта штодзённае чытанне Бібліі, па словах святара, можа даць адказы на самыя галоўныя пытанні ў жыцці чалавека.
Напрыканцы сустрэчы айцец Фёдар падзякаваў моладзі за праяўленую ініцыятыву і пажадаў гасцям поспехаў, а таксама далейшага развіцця праваслаўна-каталіцкага дыялогу.
