У нядзелю 2 студзеня Мітрапаліт Мінска-Магілёўскі арцыбіскуп Юзаф Станеўскі здзейсніў першае ў 2022 годзе пастырскае падарожжа па архідыяцэзіі, наведаўшы парафію Беззааганнага Зачацця Найсвяйцейшай Панны Марыі ў Бабруйску.
Арцыпастыр пазнаёміўся з мясцовымі вернікамі і іх душпастырамі: пробашчам парафіі ксяндзом канонікам Андрэем Яркаўцом і вікарыем ксяндзом Канстанцінам Каракам.
У бабруйскай святыні іерарх узначаліў цэлебрацыю святой Імшы, ўдзельнікі якой маліліся аб супакоі і згодзе паміж людзьмі і паміж народамі. На пачатку новага каляндарнага года арцыбіскуп Станеўскі заклікаў вернікаў «глядзець у будучыню вачыма Бога — гэта значыць сэрцам».
«Для гэтага неабходна спярша скіраваць позірк на пачатак, дзе Слова сталася целам; дзе ўвасабілася Божае Святло і Прыгажосць, каб будаваць будучыню ў адпаведнасці з Божым планам, а не ідучы за сваімі мроямі і пажаданнямі», — падкрэсліў арцыбіскуп Станеўскі.
Іерарх заўважыў, што шматпакутны бабруйскі касцёл да гэтага часу застанецца ў знявечаным выглядзе, схаваны ад вачэй за непрывабным пяціпавярховікам, узведзеным замест касцёльнай вежы.
«Маю надзею, што гэта зменіцца; што касцёл зноў стане выглядаць як святыня і будзе бачны ва ўсёй сваёй перашапачатковай прыгажосці жыхарам горада і турыстам», — адзначыў пастыр Мінска-Магілёўскай архідыяцэзіі.
Бабруйскія вернікі шчыра падзякавалі арцыбіскупу Станеўскаму за візіт у іх супольнасць, які стаў праяваю яго айцоўскага клопату пра гэтую вялікую парафіяльную сям’ю.
