30 снежня ў касцёле святога Антонія Падуанскага і Беззаганнага Зачацця Найсвяцейшай Панны Марыі ў Паставах біскуп Віцебскі Алег Буткевіч удзяліў прэзбітэрскае пасвячэнне Валерыю Пупкевічу з законніцкай супольнасці сэрцанаў.
Як паведаміў сайт Catholicnews.by, напярэдадні ўвечары падчас святой Імшы яшчэ дыякан Пупкевіч урачыста вызнаў сваю веру і жаданне служыць у святарстве Богу і людзям.
Валерый Пупкевіч нарадзіўся 31 жніўня 1995 года ў Паставах. Паходзіць з мясцовай парафіі святога Антонія Падуанскага і Беззаганнага Зачацця Найсвяцейшай Панны Марыі. Пасля заканчэння сярэдняй школы, адчуўшы голас паклікання, уступіў у Супольнасць Святароў Найсвяцейшага Сэрца Езуса (сэрцанаў). Падрыхтоўчы год правёў у супольнасцях Ляхавічаў і Мазыра. Пасля семінарыйнай фармацыі атрымаў ступень магістра тэалогіі і прыняў дыяканскае пасвячэнне ў Стадніках (Польшча), пазней нёс служэнне ў парафіі Божай Міласэрнасці ў Гродне (Вішнявец).
На пасвячэнні прысутнічалі святары з Віцебскай і Гродзенскай дыяцэзій, настаўнікі і выхавацелі новапрэзбітара, сябры і родныя.
Шматлікія сабраты і вернікі з розных мясцін, у тым ліку і з-за мяжы, маглі духоўна далучыцца да малітвы з дапамогаю прамой трансляцыі ў сеціве.
«Трываем у радасці Божага Нараджэння.
І тут, у парафіяльнай супольнасці ў Паставах гэтая радасць павялічваецца сёння яшчэ адным нараджэннем — „нараджэннем“ святара.
Дзякуем Богу за чарговы дар паклікання, які сёння вельмі каштоўны, бо заўсёды застаюцца актуальнымі словы Езуса: „Жніво сапраўды вялікае, а работнікаў мала, таму прасіце Гаспадара жніва, каб паслаў работнікаў на жніво сваё“. Сёння яшчэ адно маладое сэрца адказала „так“ на Божы заклік», — сказаў біскуп Буткевіч на пачатку ўрачыстай Літургіі.
Дыякан Валерый Пупкевіч пацвердзіў сваю прысутнасць, пасля чаго настаяцель супольнасці сэрцанаў у Беларусі ксёндз Ян Этэль SCI звярнуўся да біскупа з просьбай аб яго пасвячэнні.
У прамоўленай гаміліі іерарх засяродзіўся на пакліканні і святарскім служэнні, што мае тры вымярэнні: абвяшчэнне Евангелля, асвячэнне праз сакрамэнты і пастырскае кіраванне супольнасцю Касцёла.
Біскуп зазначыў, што служэнне ў адпаведнасці з пакліканнем — ці ў сямейным жыцці, ці ў святарстве — гэта заўсёды шчасце.
Пасля гаміліі адбылося пасвячэнне. Напачатку дыякан лёг крыжам перад алтаром, а вернікі разам са святарамі маліліся Літаніяй да Усіх Святых. Потым праз ускладанне рук біскупа і ўсіх прысутных святароў, а таксама адмысловую малітву кандыдат прыняў ласку прэзбітэрскага пасвячэння, пасля чаго апрануў святарскае адзенне. Завяршыўся абрад намашчэннем рук новапрэзбітара алеем хрызмам і прывітаннем супакою.
Напрыканцы святой Імшы новапасвячаны падзякаваў Найсвяцейшаму Сэрцу Езуса за атрыманы дар святарства. Словы ўдзячнасці ён скіраваў біскупу Алегу Буткевічу, сабратам і выкладчыкам з семінарыі, а таксама ўсім тым, хто дапамагаў яму на шляху да святарства.
Прыміцыйная святая Імша новапрэзбітэра Валерыя Пупкевіча SCI, які стаў дзясятым святаром сэрцанінам з Беларусі, адбылася ў пастаўскай святыні 1 студзеня, ва ўрачыстасць Святой Багародзіцы Марыі.
