11 снежня ў цэнтры Caritas Мінска-Магілёўскай архідыяцэзіі ў Ляскоўцы адбылася аплаткавая сустрэча ўдзельнікаў Школы сямейнага жыцця.
Распачалася перадкалядная сустрэча супольнай Эўхарыстыяй, цэлебрацыю якой узначаліў Мітрапаліт Мінска-Магілёўскі арцыбіскуп Юзаф Станеўскі.
У гаміліі іерарх засяродзіў увагу на неабходнасці няспыннай перамены свайго жыцця ў наследаванні Езуса, каб так, як вялікія мужы — прарок Ілля і Ян Хрысціцель, — рупліва рабіць роўнымі сцежкі жыцця, каб яны вялі нас да Бога.
Арцыбіскуп падкрэсліў важнасць задання навучэнцаў Школы сямейнага жыцця, якія, набыўшы адпаведныя веды і досвед, дапамагаюць іншым будаваць сямейнае жыццё згодна з праўдай Евангелля і ў сваім асяроддзі распаўсюджваюць хрысціянскія каштоўнасці.
На заканчэнне святой Імшы іерарх пажадаў усім прысутным, згодна з вучэннем Папы Францішка, несці на далоні Евангелле ў свет, каб яно было даступным для кожнага чалавека.
Пасля Імшы дырэктар Школы сямейнага жыцця айцец Сяргей Трысцень OCD падзякаваў усім за супольную малітву і запрасіў прысутных на далейшае супольнае святкаванне. На пачатку сустрэчы студэнты, выкладчыкі і госці прынялі ўдзел у пастаноўцы каляднай батлейкі, якая ў чарговы раз наблізіла ўсім прысутным духоўны змест Божага Нараджэння.
Выкладчыкі і навучэнцы школы разам з іерархам спявалі калядкі, а потым арцыбіскуп Станеўскі прачытаў малітву благаслаўлення аплаткаў, дзелячыся якімі, удзельнікі сустрэчы абменьваліся святочнымі віншаваннямі і зычэннямі.
Пасля супольнага пасілку, якім завяршылася сустрэча, выкладчыкі і студэнты працягнулі працу і навучанне.
