9 снежня ў мінскім архікатэдральным касцёле Найсвяцейшага Імя Марыі прайшла калядная сустрэча духавенства і кансэкраваных асоб, якія нясуць служэнне ў Мінска-Магілёўскай архідыяцэзіі.
Яна стала не толькі першай сустрэчай духавенства архідыяцэзіі з новым Мітрапалітам Мінска-Магілёўскім арцыбіскупам Юзафам Станеўскім, але таксама першай пастырскай сустрэчай пасля працяглага перапынку, звязанага з санітарнымі абмежаваннямі з-за каранавірусу.
Удзельнікі павіншавалі з 25-годдзем святарства Генеральнага вікарыя архідыяцэзіі біскупа Юрыя Касабуцкага і святароў, якія 7 снежня 1996 года разам з ім прынялі прэзбітэрскае пасвячэнне.
Сустрэча распачалася супольнай малітвай Літургіі гадзінаў і працягнулася аскетычнай канферэнцыяй на тэму ўдзячнасці, якую прамовіў ксёндз канонік Аляксандр Барыла, пробашч парафіі Узвышэння Святога Крыжа ў Вілейцы, прызначаны духоўным айцом архідыяцэзіі.
Кульмінацыяй сустрэчы стала святая Імша, цэлебрацыю якой па просьбе арцыбіскупа Станеўскага ўзначаліў Апостальскі нунцый у Беларусі арцыібскуп Антэ Ёзіч.
На пачатку Эўхарыстыі прадстаўнік Папы Францішка ў нашай краіне нагадаў пра распачаты сінадальны шлях, да ўдзелу ў якім пакліканы не толькі святары і біскупы, а ўвесь Божы народ, каб даць належны адказ на выклікі часу. «Паўсюдны Касцёл жадае пачуць і задзейнічаць кожную частку партыкулярных Касцёлаў. У Касцёле неабходна сінадальна слухаць, сінадальна гаварыць і дзейнічаць сінадальна.
Цяперашні Сінод з’яўляецца вырашальным момантам для Касцёла, але ён таксама павінен стаць спрыяльнай нагодай для навяртання для ўсіх яго сыноў і дачок: біскупаў і святароў, кансэкраваных асоб і свецкіх вернікаў», — падкрэсліў Апостальскі нунцый.
Карыстаючыся нагодай, ён выказаў найлепшыя пажаданні тым, хто сёлета святкуе 25-годдзе святарскага пасвячэння: дапаможнаму біскупу Юрыю Касабуцкаму, ксяндзу Яну Крэмісу, ксяндзу Уладзіславу Шышлу і ксяндзу Аляксандру Чайкоўскаму.
«Касцёл дзякуе вам за ваша вернае служэнне і малітвы. Я рады, што магу перадаць вам ад імя Святога Айца Папы Францішка яго ружанцы разам з пажаданнем здароўя і ўсялякага Божага благаслаўлення ў вашых будучых абавязках», — з гэтымі словамі прадстаўнік Святога Айца уручыў прысутным на цэлебрацыі юбілярам папскія падарункі.
Божае слова на Эўхарыстыі прамовіў папярэднік арцыбіскупа Станеўскага на пасадзе Мітрапаліта Мінска-Магілёўскага арцыбіскуп эмерыт Тадэвуш Кандрусевіч.
Ён яшчэ раз павіншаваў свайго наступніка з новай пасадай і пажадаў на ёй Божага благаслаўлення, апекі Божай Маці і нябеснага апекуна святога Юзафа.
Заслужаны іерарх папрасіў святароў, кансэкраваных асоб і ўсіх вернікаў прыняць яго як айца, кіраўніка і настаўніка. Арцыбіскуп Кандрусевіч таксама павіншаваў святароў-юбіляраў і пажадаў ім «надалей быць на пярэдняй лініі фронту змаганняў за духоўнае жыццё нашага народа, каб выклікі секулярызму, маральнага рэлятывізму і розных крызісаў не згасілі яго».
У гаміліі арцыбіскуп эмерыт звярнуўся да словаў з Евангелля на чацвер Другога тыдня Адвэнту, у якіх Езус называе святога Яна Хрысціцеля найбольшым на зямлі, але адначасова меншым за найменшага ў нябесным Валадарстве.
«Ян найбольшы, бо быў пакліканы Богам падрыхтаваць людзей да прыйсця Збаўцы і паказаць яго людзям. Меншы за найменшага ў небе, бо на зямлі не атрымаў сакрамэнтальнай ласкі, якую атрымліваюць звычайныя хрысціяне, і якая патрэбная для збаўлення», — пракаментаваў словы Збаўцы іерарх. Ён дадаў, што Ян Хрысціцель, тым не менш, адыграў вялікую роль ў Божым плане збаўлення чалавецтва: падрыхтаваў сэрцы сваіх сучаснікаў да сустрэчы з Езусам і паказаў ім шлях да адносін з Богам. Яго вучэнне актуальнае і ў наш час, бо заклікае да перамены сэрца, ладу жыцця, стаўлення да Бога і бліжніх.
«Ён таксама заклікае нас рэалізоўваць у жыцці тое, што вызнаем словамі. Гэта актуальна для ўсіх хрысціянаў, а тым больш актуальна для святароў і кансэкраваных асоб. Мы павінны быць не валадарамі іншых, але іх слугамі, і рабіць гэта належыць па прыкладу святога Яна Хрысціцеля, у пакоры. Асоба святога Яна Хрысціцеля і яго служэнне Богу і людзям з’яўляецца добрым прыкладам для святароў.
Словы Езуса, што няма большага сярод народжаных жанчынамі, смела можна аднесці да кожнага са святароў, але адначасова трэба памятаць аб тым, што найменшы ў нябесным Валадарстве большы за яго, і так працаваць, каб заслужыць радасць неба», — падкрэсліў арцыпастыр, які сам удзяліў многім з прысутных святароў сакрамэнт прэзбітэрскага пасвячэння.
На заканчэнне гаміліі іерарх выказаў пажаднні юбілярам.
«У сваім служэнні будзьце ярка ззяючай свечкай, якая згарае даканца. Сваім вопытам, малітвай і прыкладным служэннем людзям і адно аднаму падтрымлівайце прэзбітарскае адзінства Мінска-Магілёўскага Касцёла. Будуйце адзінства з кансэкраванымі асобамі і Божым Народам.
Няхай сімвалам такога адзінства стане першая пастырская сустрэча з новым Мінска-Магілёўскім Мітрапалітам арцыбіскупам Юзафам Станеўскім, падчас якой мы падзелімся аплаткамі. Як многія зярняткі ў аплатцы ўтвараюць адно, так і мы, розныя, павінны быць адзінымі», — сцвердзіў арцыбіскуп Кандрусевіч.
На заканчэнне святой Імшы адбылося дзяленне традыцыйнай аплаткай, падчас якога ўдзельнікі абмяняліся святочнымі віншаваннямі, захоўваючы пры гэтым санітарныя прадпісанні. Пасля Эўхарыстыі прайшла арганізацыйная частка сустрэчы, на якой былі абвешчаны новыя прызначэнні і ўручаны біскупскія дэкрэты.
