У нядзелю 12 верасня ў Ганцавічах (Пінская дыяцэзія) адбылася сустрэча сем’яў Паўднёвага сектара руху Equipes Notre-Dame (ЭНД).
У гэты сонечны восеньскі дзень у Ганцавічы, невялікі палескі горад, прыехалі сем’і з розных куткоў Беларусі.
Распачалася сустрэча урачыстай святой Імшой, падчас якой да супольнасці далучылася яшчэ адна сям’я: Анна і Аляксандр Гаргуны.
Яны ўрачыста прынялі хартыю руху Equipes Notre-Dame і далі абяцанне жыць згодна з правіламі жыцця супольнасці.
Духоўны дарадчык сем’яў і пробашч ганцавіцкай парафіі ксёндз Ян Саламон у прамоўленым Божым слове адзначыў, што святасць — гэта пакліканне і мэта жыцця кожнага чалавека.
«Шлях да святасці доўгі, і невядома, што нас чакае ў дарозе. Сёння, калі мы выпраўляемся ў падарожжа, то вывучаем карту або ўключаем GPS.
Рух Equipes Notre-Dame і яго правілы жыцця — гэта штосьці накшталт навігатара, які дапамагае падарожным трымацца правільнага шляху», — падкрэсліў святар.
Пасля святой Імшы адбылася забаўляльная праграма са шматлікімі конкурсамі, якія дапамаглі адчуць сябе часткай вялікай духоўнай сям’і, а сужонкам стаць бліжэй адзін да аднаго.
Уражаннямі ад сустрэчы падзяліліся Наталля і Сяргей Бобка, адказныя за Паўднёвы сектар Руху.
«Гэта сапраўды было духоўна, шчыра і весела. Мы былі вельмі радыя падчас сустрэчы прыняць у нашу духоўную супольнасць сям’ю Гаргун. Дзякуем усім, хто прысутнічаў, а гэта суполкі з Нясвіжа, Новай Мышы, Пінска, сябры з Мінска і, канечне, усім, хто далучыўся да арганізацыі гэтага мерапрыемства. Лічым, што гэта вялікае сведчанне нашай веры і жыцця ў Руху ЭНД», — адзначылі сужонкі.
