![](/3/images/news/2021/09/2021-09-07-12345.jpg)
Вераснёўскі нумар часопіса «Ave Maria» прысвечаны тром дарам Духа Святога: мудрасці, розуму і рады.
Як адзначаецца на сайце часопіса ave-maria.by, дары Духа Святога надзвычай важныя ў жыцці чалавека.
Паводле галоўнага рэдакатара выдання Крыстыны Лялько, «асабліва ў цяперашні час, калі людзі ў гэтым глабалізаваным свеце такія раз’яднаныя, усім нам трэба памятаць, што Дух Святы — гэта Крыніца еднасці, і як мага часцей прыпадаць да гэтай Крыніцы».
У дзявятым нумары чытачы знойдуць грунтоўнае даследванне доктара тэалогіі ксяндза Юрыя Дразда, прысвечанае дарам Духа Святога у перспектыве Старога і Новага Запавету. У традыцыйнай рубрыцы «Святар адказвае на пытанне» ксёндз Андрэй Рылка дзеліцца думкамі на тэму, чаму Каталіцкі Касцёл вылучае менавіта сем дароў Духа Святога. У рубрыцы «Школа малітвы» айцец Юрый Кулай OCD заклікае хрысціянаў больш уважліва ставіцца да багацця гэтых дароў, бо мы часам перастаем іх заўважаць.
Айцец Яўген Голуб OFMConv і Тэрэса Клімовіч падрыхтавалі артыкулы, прысвечаныя разважанням аб згаданых трох дарах Духа Святога ў жыцці чалавека. Эсэ Арцёма Ткачука прысвечана сакрамэнту канфірмацыі, падчас якога мы чуем такія важныя словы: «Прымі знак дару Духа Святога», а ў артыкуле па матывах цыклу відэалекцый айца Адама Шустака ОР «Miriam» ідзе гаворка пра натхнёнасць Божай Маці Духам Святым.
Амаль у кожным нумары «Ave Maria» Галіна Калевіч распавядае пра лёсы і жыцці беларускіх вернікаў. Гэтым разам яна падрыхтавала сведчанне пра Валерыя Станчыка і яго сям’ю.
На старонках дзявятага нумара апублікаваны матэрыялы пра дзве важныя ініцыятывы.
Тут змешчана інтэрв’ю, прысвечанае начным малітоўным адарацыям Найсвяцейшага Сакрамэнту ў інтэнцыі абароны жыцця і сям’і, якія штомесяц праводзяцца ў адным з раёнаў Мінска, у капліцы святога Яна Евангеліста і святога Максімільяна Марыі Кольбэ, дзе служыць ксёндз Алег Шпець SChr. Другая, надзвычай значная для Беларусі ініцыятыва, — гэта цэнтр дапамогі залежным «Светач», які 5 гадоў таму заснавалі ў Бягомлі Уладзімір і Таццяна Шчэпіны. За гэты час у ім прайшлі рэабілітацыю 120 чалавек, залежных ад алкаголю і наркотыкаў.
Напрыканцы лета ў Беларусі адбылося пасвячэнне дзвюх новых святынь — у Барысаве і Старых Дарогах. Рэпартажы з гэтых цудоўных падзей у жыцці мясцовага Касцёла таксама можна знайсці ў вераснёўскім нумары часопіса, як і шэраг іншых цікавых матэрыялаў.