31 ліпеня ў беларускай супольнасці Ордэна Меншых Братоў Капуцынаў вечныя манаскія абяцанні прынеслі брат Вадзім Войцік OFMCap і брат Павел Кузьміч OFMCap.
Урачыстасць прынясення вечных манаскіх абяцанняў прайшла ў капуцынскім касцёле Найсвяцейшай Тройцы ў Докшыцах (Віцебская дыяцэзія). У прысутнасці новаабранага Кусташа Беларускай Кустодыі Ордэна Меншых Братоў Капуцынаў брата Андрэя Букштана OFMCap, сабратоў і вернікаў браты Вадзім і Павел паабяцалі да канца жыцця трымацца евангельскіх парадаў чыстасці, убоства і паслухмянасці.
Паколькі вечным абяцанням папярэднічалі доўгі час фармацыі ў Ордэне і неаднаразовыя часовыя абяцанні, брат Андрэй, звяртаючыся да маладых сабратоў, зазначыў, што для іх гэта не пачатак, а працяг манаскага жыцця.
Прынясенне вечных манаскіх абяцанняў, тым не менш, з’яўляецца важным этапам манаскага жыцця. Пасля гэтага маладыя капуцыны могуць быць дапушчаныя да прыняцця сакрамэнту пасвячэння.
Запіс трансляцыі з урачыстасці прынясення вечных манаскіх абяцанняў можна паглядзець ТУТ>>>
