![](/3/images/news/2021/07/2021-07-31-Bilewa-scaled.jpg)
Курыя Віцебскай дыяцэзіі паведамляе, што ў ноч з 29 на 30 ліпеня адбыўся крадзеж на будоўлі касцёла святога Ігнацыя Лаёлы ў Віцебску.
Як адзначаецца ў паведамленні Курыі, апублікаваным на сайце Catholicnews.by, невядомыя асобы праніклі ў будынак касцёла, абрэзалі і скралі правады электраправодкі і акустычнай сістэмы, нанесшы такім чынам матэрыяльную шкоду ў буйным памеры.
Каб направіць учыненую шкоду, магчыма, будзе неабходным нанава пракладаць электраправодку і правады акустычнай сістэмы касцёла.
Асабліва засмучае тое, што крадзеж адбыўся ў ноч перад афіцыйным днём завяршэння будаўнічых работ, які быў прызначаны на 31 ліпеня — літургічны ўспамін святога Ігнацыя Лаёлы.
Генеральным падрадчыкам будоўлі новага касцёла ў Віцебску з’яўляецца ТАА «Проф НК».
На наступны дзень пасля выяўлення факта крадзяжу на будоўлі працавала група спецыялістаў следчага камітэту.