Пошук

27.04.2021 19:59   Размаўляла Фаіна Малюжэнец / Catholic.by

У красавіку працягнула сваю працу біблійная школа «Профэтэс» пры парафіі святога Міхала Арханёла ў Навагрудку.

Заняткі па вывучэнні Святога Пісання для ўсіх ахвотных, якія праходзілі з 16 па 18 красавіка, адбыліся ў горадзе Міцкевіча ўжо ў чацвёрты раз. Незвычайны праект стартаваў у студзені па ініцыятыве пробашча навагрудскай парафіі святога Міхала Арханёла ксяндза Юрыя Жэгарына. Яго назва Προφήτης, узятая з грэчаскай мовы, азначае «Прарок».

Праект сабраў у Навагрудку лепшых касцёльных спецыялістаў па Бібліі ў нашай краіне.

У красавіку заняткі тут праводзілі, між іншым, ксёндз Аляксандр Мацкевіч, доктар біблійнай тэалогіі, выкладчык Міждыяцэзіяльнай вышэйшіай духоўнай семінарыі і Тэалагічнага каледжу святога Казіміра ў Гродне, і ксёндз Валерый Марціноўскі, доктар біблійнага тэалогіі, выкладчык Міждыяцэзіяльнай вышэйшай духоўнай семінарыі ў Гродне і духоўны айцец Віцебскай дыяцэзіі.

Карэспандэнт парафіяльнай газеты Фаіна Малюжэнец запыталася ў біблійных багасловаў пра іх бачанне гэтай евангелізацыйнай ініцыятывы.

Кс. Аляксандр Мацкевіч:

— Слухачы школы маюць вельмі добрае прагненне — пазнаваць Святое Пісанне.

Біблія — слабое месца многіх каталікоў: звычайна людзі знаёмыя з ёю павярхоўна. Таму лічу, што біблійная школа вельмі патрэбная.

Тут добрыя слухачы, уважлівыя, зацікаўленыя ў вывучэнні Бібліі. Вядома, што школа для свецкіх людзей мае сваю спецыфыку. У семінарыі студэнты вучаць Біблію па праграме навучання, больш глыбока і дэтальна. Для свецкіх людзей немагчыма выкладаць Святое Пісанне ў такім аб’ёме. Але, на маю думку, заняткі ў школе для свецкіх таксама дастаткова грунтоўныя і змястоўныя.

Відаць, што слухачы знаёмыя са Святым Пісаннем, любяць яго, сістэматычна чытаюць, папросту жывуць Бібліяй. Ва ўсялякім разе, у мяне склалася такое ўражанне. Радуюся, што ёсць людзі, зацікаўленыя словам Божым, гатовыя прысвяціць час і старанні, каб яго яшчэ лепей пазнаць.

Кс. Валерый Марціноўскі:

— Я ўжо ў другі раз праводжу тут заняткі і бачу зацікаўленасць слухачоў. Але адначасова бачу і розны ўзровень іх падрыхтоўкі. Самае складанае для выкладчыка — усвядоміць, што перад табой не навукоўцы.

Я таксама не адразу ведаў Біблію: цалкам яе прачытаў толькі ў семінарыі. У школе ж некаторыя са слухачоў нават цытуюць Святое Пісанне, яны свядома слухаюць яго.

Біблія — гэта невычэрпная кніга. Таму са слухачамі школы на працягу года будзем сістэматычна працаваць над яе вывучэннем: чытаць, разбіраць і г.д.

Запісацца ў біблійную школу «Профэтэс» можна па тэлефоне +375 (44) 771 99 83, або даслаўшы ліст на электронны адрас: nowogrudec@gmail.com.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця