19 красавіка на радыё Беларусь 1 адбыўся запіс інтэрв’ю з дырэктарам Рэлігійнай місіі «Дабрачыннае каталіцкае таварыства Caritas» Канферэнцыі Каталіцкіх Біскупаў у Беларусі ксяндзом Віталіем Дабраловічам і менеджэрам праекта ў «Caritas» Мінска-Магілёўскай архідыяцэзіі Людмілай Гур. Размова ішла аб рэалізацыі праекту YES! у Беларусі.
Госці студыі распавялі пра бягучую дзейнасць у межах праекту, а таксама акрэслілі кірункі далейшай працы.
Плануецца, што запіс размовы прагучыць у ранішнім нядзельным радыёэфіры 25 красавіка. Як паведамляецца на сайце Сaritas.by, гадзіна трансляцыі будзе пададзена пазней.
Міжнародны гуманітарны дабрачынны праект YES! (Youth Empowerment and Strengthening) — «Скарачэнне беднасці праз працаўладкаванне сацыяльна-ўразлівай моладзі ў менш развітых рэгіёнах Беларусі» — рэалізуецца нацыянальным «Карытас» па ўсёй краіне пры падтрымцы Renovabis (Германія) і Caritas Linz (Аўстрыя) з мэтай павышэння ўзроўню жыцця неабароненых маладых людзей Беларусі ва ўзросце 18–35 гадоў.
Нагадаем, што Каталіцкі Касцёл у Беларусі ўжо больш за 20 гадоў супрацоўнічае з радыё Беларусь 1, у праграму нядзельнага эфіру якога на працягу гэтага часу ўваходзіла трансляцыя нядзельных святых Імшаў у 8.15. У жніўні 2020 года трансляцыя без тлумачэнняў была спынена. 11 красавіка, праз восем месяцаў перапынку, святая Імша зноў была ўключана ў праграму эфіру, аднак у пастаянную сетку перадач трансляцыі з мінскай катэдры ўнесены не былі.
