17 лютага ў Каталіцкім Касцёле распачаўся Вялікаі пост. Першы дзень гэтага літургічнага перыяду называецца Папялец: вернікі пасыпаюць галовы попелам.
Гэты старажытны абрад, які не раз узгадваецца ў Святым Пісанні, паходзіць са старадаўніх часоў і з’яўляецца выразам пакаяння за грахі, а таксама сімвалам прамінальнасці ўсяго зямнога.
Сёлета ва ўмовах складанай эпідэміялагічнай сітуацыі ў абрад пасыпання галоваў попелам былі ўнесены пэўныя дастасаванні, мэта якіх — мінімалізаваць рызыку заражэння віруснай інфекцыяй.
Фотакарэспандэнт Catholic.by Віталій Палінеўскі наведаў сталічны касцёл святога Сымона і святой Алены (Чырвоны касцёл), дзе з самай раніцы вернікі сабраліся на святую Імшу, падчас якой адбываецца абрад пасыпання галоваў попелам.
