12 студзеня Кангрэгацыя Божага Культу і Дысцыпліны Сакрамэнтаў выдала Ноту, якой у паўсюдным Касцёле ўстанаўліваецца новая форма пасыпання галоваў попелам у Папяльцовую сераду.
Сёлета Вялікі пост распачнецца 17 лютага, і ў гэты дзень святары ва ўсім свеце з увагі на пандэмію каранавірусу абавязаны прытрымлівацца новага парадку пасыпання галоваў попелам.
Нота акрэслівае, што пасля благаслаўлення попелу і акраплення яго асвячонай вадой, якое адбываецца без словаў, святар звяртаецца да прысутных, адзін раз прамаўляючы адну з формул, пададзеных на Папяльцовую сераду ў Рымскім Імшале: «Навяртайцеся і верце ў Евангелле» або «Памятай, што ты прах і ў прах вернешся».
Пасля гэтага святар ачышчае рукі, накладае ахоўную маску, якая закрывае нос і рот, і пасыпае галовы тым, хто да яго падыходзіць, або, калі так зручней, сам падыходзіць да людзей, якія стаяць на сваіх месцах. Святар пасыпае галовы попелам, не прамаўляючы пры гэтым ніякіх словаў.
Ноту з новымі прадпісаннямі падпісалі Прэфект Кангрэгацыі Божага Культу і Дысцыпліны Сакрамэнтаў кардынал Рабэр Сара, а таксама сакратар арцыбіскуп Артур Рошэ.
