12 лютага Ганароваму Мітрапаліту Мінска-Магілёўскаму арцыбіскупу Тадэвушу Кандрусевічу была ўручана ўзнагарода «Гонар і годнасць» за заслугі ў адраджэнні шляхецкіх і дваранскіх традыцый.
Узнагароду арцыбіскупу ўручыў Старшыня Сходу нашчадкаў шляхты і дваранства Ігар Чакалаў-Шыдлоўскі.
Уручэнне знаку Заслуг адбылося ва ўрачыстай абстаноўцы ў Мітрапалітальнай Курыі ў Мінску ў прысутнасці членаў Сходу нашчадкаў шляхты і дваранства. У сувязі са складанай эпідэміялагічнай сітуацыяй колькасць удзельнікаў мерапрыемства была абмежаванай.
Узнагарода стала выразам прызнання заслуг Ганаровага Мітрапаліта Мінска-Магілёўскага ў адраджэнні высокіх шляхецкіх і дваранскіх традыцый.
Згодна са статутам узнагароды, яе атрымліваюць за ўнёсак у адраджэнне высокіх ідэалаў шляхты і дваранства, канкрэтныя справы дзеля ўмацавання маральнасці і этычных нормаў, фармавання патрыятычных адносін да гісторыі і культуры, за працу ў сацыяльнай, дабрачыннай і асветніцкай галіне.
Знак Заслуг уяўляе сабой харугву чырвонага колеру, у сярэдзіне якой шчыт з геральдычнай шляхецкай каронай. Над харугвай — белы голуб як сімвал Божага заступніцтва і міралюбнасці. Харугва акружана вянком, адна палова якога — дубовае лісце, а другая — лаўровае. На іх залатая стужка з надпісам 2009 г. (год стварэння Сходу).
Унізе на залатой стужцы словы: «Гонар і годнасць» — галоўны прынцып жыцця Сходу.
