17 студзеня ў араторыі імя святога Яна Боско, які дзейнічае пры смаргонскай парафіі святога Міхала Арханёла, адбылося адкрыццё дзявочага клубу «Нашы сакрэты».
Як паведамляе Sdb.by, iдэя арганізаваць такі клуб з'явілася з жадання паспрабаваць адрадзіць хрысціянскія духоўныя каштоўнасці і традыцыі сярод дзяўчынак — будучых добрых хрысціянак і сумленных жанчын нашага грамадства. Восем маладых жанчын, сярод якіх аніматары і маладыя мамы, разам з с. Веранікай Блізнюк FMA будуць імкнуцца выхоўваць удзельніц у духоўнасці, прыгажосці, радасці і вытанчанасці.
Бо мэтай клубу з’яўляецца хрысціянскае духоўнае выхаванне, накіраванае на эстэтычнае, маральнае, псіхалагічнае і фізічнае развіццё асобы і талентаў дзяўчынак.
Удзельніцы клубу прыйшлі на адкрыццё са сваімі бацькамі. Мерапрыемства пачалося з прывітання і ўводнага слова, з якім звярнулася да сабраных с. Вераніка.
Удзельніц і гасцей чакалі сумесная малітва, гульні, гутарка з бацькамі, прэзентацыя, у якой асвятлялася дзейнасць клубу. Выхавальніцы пазнаёмілі прысутных з задачамі клубу, сярод якіх падкрэслілі фармаванне пачуцця справядлівасці і міласэрнасці, вернасці, высакароднасці і чысціні (цноты), развіццё ідэі дабра, прыгажосці і агульначалавечай маралі, знаёмства з асновамі этыкету і прывіццё добрых манераў, пачуцця стылю, такту, навыкаў догляду за сваёй знешнасцю.
Наведваць клуб будуць вучаніцы 3-5 класаў.
На першай сустрэчы прысутнічала 30 удзельніц. Сустрэчы будуць праводзіцца двойчы ў месяц у дзвюх групах.
На заканчэнне мерапрыемства пробашч парафіі кс. Павел Шчарбіцкі SDB падкрэсліў, як важна ў сучасным свеце быць добрай мамай і сапраўднай жанчынай, памаліўся разам з прысутнымі і благаславіў іх на добрую справу.
