Біскуп Віцебскі Алег Буткевіч скіраваў дэкрэт адносна аплаткавых сустрэч і каляднага наведвання сем’яў у дыяцэзіі.
У сувязі з эпідэміяй каранавірусу з клопатам пра духоўнае і фізічнае здароўе вернікаў на перыяд Божага Нараджэння 2020-2021 года пастанаўляю наступнае:
- Адмяніць традыцыйныя аплаткавыя сустрэчы для духавенства Віцебскай дыяцэзіі.
- Адмяніць традыцыйныя конкурсы батлеек і каляднай песні.
- У парафіях паводле разважлівага меркавання пробашчаў можна арганізаваць аплаткавыя сустрэчы са святой Імшой або іншым адпаведным набажэнствам прадстаўнікоў асобных катэгорый вернікаў (дзяцей, моладзі, сем’яў і інш.), з максімальным захаваннем правілаў эпідэміялагічнай бяспекі.
- Традыцыйныя душпастырскія візіты ў сем’і з благаслаўленнем дамоў або памяшканняў (так званая Каляда) могуць адбывацца выключна па запрашэнні асобных сем’яў або людзей з захаваннем рэкамендацый Міністэрства аховы здароўя і раней выдадзеных распараджэнняў касцёльных уладаў.
- Забяспечыць захаванне сацыяльнай дыстанцыі пры наведванні традыцыйных батлеек у касцёлах і капліцах або побач з імі.
- Шаноўных святароў прашу стварыць магчымасць скарыстацца сакрамэнтальнай паслугай хворым і пажылым людзям па іх жаданні, захоўваючы пры гэтым усе сродкі эпідэміялагічнай бяспекі.
З пастырскім благаслаўленнем на плённую падрыхтоўку да святаў Божага Нараджэння і радаснае іх перажыванне
+Алег Буткевіч
Біскуп Віцебскі
Віцебск, 11 снежня 2020 г.
