29 верасня, у свята святых Арханёлаў Міхала, Габрыэля і Рафала, парафія ў Варапаеве адзначыла адпустовую ўрачыстасць. Нябесным апекуном парафіі з’яўляецца святы Міхал Арханёл.
Як паведамляе Catholicnews.by, таксама ў гэты дзень парафія развіталася са сваім пробашчам кс. Юрыем Вількам SCJ, які быў там з 2015 года вікарыем, а з 2016 пробашчам. 4 верасня святар, які мае польскае грамадзянства, але шмат гадоў служыў на тэрыторыі Беларусі, атрымаў ліст ад упаўнаважанага па справах рэлігій і нацыянальнасцяў Леаніда Гулякі, які адмяняе дазвол на яго служэнне ў нашай краіне.
На Імшы прысутнічалі дэкан Пастаўскага дэканату кс. Павел Самсонаў, сабраты з кангрэгацыі айцоў сэрцанаў з Паставаў, Гродна і Шаркаўшчыны, святары з суседніх парафій.
Узначаліў цэлебрацыю і прамовіў гамілію віцэ-дэкан Пастаўскага дэканату кс. Аляксандр Баран, пробашч парафіі ў Лынтупах.
Ксёндз Павел Самсонаў ад імя біскупа Віцебскага Алега Буткевіча ўручыў кс. Юрыю Вільку падзяку за ахвярнае шматгадовае служэнне Каталіцкаму Касцёлу ў Беларусі як адданага душпастыра Віцебскай дыяцэзіі.
Словы падзякі і перапрашэння выказалі пробашчу варапаеўскія парафіяне.
Раней ён працаваў на Пастаўшчыне, таму на ўрачыстасць прыбылі і пастаўскія вернікі, каб развітацца з ім і падзякаваць за гады служэння.
На заканчэнне ўрачыстасці адбыліся выстаўленне Найсвяцейшага Сакрамэнту і эўхарыстычная працэсія з фігурай св. Міхала і спевам гімну «Магутны Божа».
