29 верасня, у свята святога Арханёла Міхала, Мітрапаліт Мінска-Магілёўскі арцыбіскуп Тадэвуш Кандрусевіч прызначыў ксяндза Ігара Лашука ганаровым канонікам Мінска-Магілёўскага катэдральнага капітулу.
Пра гэта іерарх, які знаходзіцца ў выгнанні, паведаміў у спецыяльным відэазвароце да духавенства і вернікаў Касцёла на Беларусі, якія сабраліся на ўрачыстым набажэнстве ў мінскім катэдральным касцёле Найсвяцейшага Імя Марыі.
У гэты дзень святой Імшой з удзелам канонікаў катэдральнага капітулу, цэлебрацыю якой узначаліў Генеральны вікарый Мінска-Магілёўскай архідыяцэзіі біскуп Юрый Касабуцкі, завяршылася перэгрынацыя фігуры нябеснага апекуна Касцёла на Беларусі святога Арханёла Міхала па катэдрах усіх чатырох беларускіх дыяцэзій.
Ініцыятарам перэгрынацыі ў інтэнцыі мірнага вырашэння грамадска-палітычнага крызісу і спынення пераследу Касцёла ў нашай краіне выступіў пробашч парафіі святога Казіміра ў Стоўбцах і кусташ фігуры святога Арханёла Міхала ксёндз Ігар Лашук.
