19 верасня ў санктуарыі Маці Божай Шкаплернай у Гудагаі, якім апякуюцца айцы кармэліты босыя, біскуп Гродзенскі Аляксандр Кашкевіч удзяліў сакрамэнт пасвячэння ў ступені прэзбітэрату брату Ігнату Падарэцкаму OCD.
Гэта стала важнай падзеяй у жыцці Рэгіянальнага Вікарыяту кармэлітаў босых у Беларусі.
На ўрачыстай святой Імшы перад цудадзейным абразом Маці Божай Шкаплернай сабраліся браты гэтага манаскага ордэна з усіх кляштараў Вікарыяту.
Сярод прысутных былі бацькі айца Ігната, яго брат, родныя і блізкія, сёстры кармэліткі Дзіцяткі Езуса, а таксама вернікі парафіі ў Гудагаі, з якой паходзіць новапрэзбітэр, і вернікі з Мінска, дзе ён нёс дыяканскае служэнне і працягне служыць як святар.
У прамоўленай гаміліі біскуп Аляксандр Кашкевіч звярнуў увагу на ролю святара ў сучасным свеце. Іерарх таксама заахвоціў удзельнікаў урачыстасці маліцца ў інтэнцыі айца Ігната і ўсіх святароў.
Пасля ўдзеленага пасвячэння новапрэзбітэр упершыню далучыўся да цэлебрацыі Эўхарыстыі, а ў нядзелю 20 верасня цэлебраваў у роднай гудагайскай святыні сваю першую святую Імшу — прыміцыю.
Айцец Ігнат Падарэцкі OCD стаў яшчэ адным святаром у супольнасці кармэлітаў босых, які нарадзіўся і вырас у Беларусі, дзе гэты ордэн адыграў важную ролю ў справе евангелізацыі і гісторыі мясцовага Касцёла.
Урачыстасць пасвячэння ў Гудагаі стала нагодаю для падзякі Найвышэйшаму за шматлікія пакліканні да служэння Богу і людзям у ордэне кармэлітаў босых з нашай зямлі. Прысутныя вернікі маліліся аб тым, каб заступніцтва Каралевы Кармэлю Маці Божай Шкаплернай спадарожнічала айцу Ігнату на шляху яго манаскага і святарскага паклікання.
