7 верасня ва ўсіх дыяцэзіях Касцёла на Беларусі адбыліся малітоўныя сустрэчы кансэкраваных асобаў.
Прадстаўнікі мужчынскіх і жаночых супольнасцяў кансэкравнага жыцця і таварыстваў апостальскага жыцця сабраліся на супольную малітву аб мірным вырашэнні грамадска-палітычнага крызісу ў Беларусі і аб хутчэйшым вяртанні на Радзіму Старшыні Канферэнцыі Каталіцкіх Біскупаў у Беларусі арцыбіскупа Тадэвуша Кандрусевіча.
Манахі, законнікі і законніцы маліліся разам з пастырамі Касцёла на Беларусі.
У Гродне малітоўная сустрэча праходзіла з удзелам біскупа Аляксандра Кашкевіча, у Докшыцах (Віцебская дыяцэзія) — з удзелам біскупа Алега Буткевіча, у Мінску — з удзелам біскупа Юрыя Касабуцкага.
Кансэкраваныя асобы Пінскай дыяцэзіі сабраліся на супольную малітву ў Баранавічах.
Сустрэчы паўсюль распачаліся з адарацыі Найсвяцейшага Сакрамэнту, а цэнтральным момантам стала Эўхарыстыя, якая цэлебравалася ў інтэнцыі Касцёла на Беларусі і ўсёй нашай краіны.
Да сабраных на малітву кансэкраваных асобаў духоўна далучыўся таксама арцыбіскуп Тадэвуш Кандрусевіч.
З выгнання ён скіраваў да ўдзельнікаў малітоўных сустрэч сваё пастырскае слова.
У ім кіраўнік беларускага каталіцкага епіскапату падзякаваў кансэкраваным асобам за вельмі актуальную ініцыятыву супольнай малітвы.
«Па прычыне немагчымасці фізічна быць на Радзіме, у гэты лёсавызначальны час нашай гісторыі я звяртаюся да вас з-за мяжы.
Хоць знаходжуся далёка, тым не менш духоўна і сэрцам я разам з вамі і падзяляю клопат аб будучыні нашай краіны і Касцёла, у жыцці якога вы адыгрываеце асаблівую ролю», — напісаў іерарх.
Ён звярнуў увагу на тое, што да пандэміі каранавірусу далучылася вельмі вострая і небяспечная праблема сацыяльна-палітычнага крызісу, які перарастае ў своеасаблівую грамадскую пандэмію са сваімі ахвярамі, фізічна і духоўна пацярпелымі.
Разважаючы над прычынаю гэтых праблем, іерарх адзначыў, што прычынай кожнага зла з’яўляецца грэх — нязгоднае з Божым законам жыццё, якое вядзе да разладу са Створцам і бліжнім і з’яўляецца прычынай розных канфліктаў.
«Наша краіна на працягу трох пакаленняў перажыла доўгі перыяд атэізацыі, які не прайшоў без следу. Атрымаўшы свабоду на пачатку 90-х гадоў мінулага стагоддзя, мы на самай справе не ведалі, як ёю належным чынам распараджацца. Не да канца ўсведамлялі, што свабода — гэта не толькі дар, але і адказнасць. Адказнасць перадусім перад Богам, з якой вынікае адказнасць перад чалавекам і грамадствам. Калі будзем адказна адносіцца да Божага закону, то на яго падставе зможам паспяхова будаваць міжчалавечыя адносіны і шчаслівае грамадства», — дадаў арцыбіскуп Кандрусевіч.
Гаворачы пра ролю кансэкраваных асобаў у працэсе навяртання і жыцця паводле Божых запаведзяў, іерарх зазначыў, што яны пакліканы стаць евангельскімі «святлом і соллю» ў сучасным бездухоўным свеце.
«У гэты лёсавызначальны час нашай гісторыі звяртаюся да вас з настойлівай просьбай: малітвай, служэннем у духу вашых харызмаў і сведчаннем кансэкраванага жыцця евангельскім святлом асвятляйце Беларусь і евангельскай соллю зберагайце яе ад маральнага псавання, каб яна будавала сваю будучыню на нязменных духоўных каштоўнасцях, што з’яўляецца гарантыяй мірнага суіснавання і паспяховага развіцця грамадства», — заклікаў кансэкраваных асобаў Беларусі арцыбіскуп Тадэвуш Кандрусевіч.
Сустрэчы працягнуліся абменам думкамі ў таварыскай атмасферы паміж прадстаўнікамі розных манаскіх супольнасцяў, якія нясуць служэнне ў мясцовым Касцёле. Удзельнікі выказвалі радасць ад таго, што пасля доўгага перапынку, выкліканага складанай эпідэміялагічнай сітуацыяй, кансэкраваныя асобы могуць зноў маліцца разам.
Малітоўныя сустрэчы кансэкраваных асобаў у розных дыяцэзіях паказалі, што складаная сітуацыя не аслабіла Касцёл, а дапамагла хрысціянам яшчэ мацней з’яднацца ў духу малітвы і вернага служэння Богу і бліжнім.
