25 жніўня Старшыня Канферэнцыі Каталіцкіх Біскупаў у Беларусі Мітрапаліт Мінска-Магілёўскі арцыбіскуп Тадэвуш Кандрусевіч скіраваў афіцыйнае віншаванне новапрызначанаму Патрыяршаму Экзарху ўсяе Беларусі Мітрапаліту Мінскаму і Заслаўскаму Веніяміну.
Яго Высокапраасвяшчэнству
Мітрапаліту Мінскаму і Заслаўскаму ВЕНІЯМІНУ
Патрыяршаму Экзарху ўсяе Беларусі
Ваша Высокапраасвяшчэнства,
дазвольце павіншаваць Вас з прызначэннем Свяшчэнным Сінодам Рускай Праваслаўнай Царквы Мітрапалітам Мінскім і Заслаўскім, Патрыяршым Экзархам усяе Беларусі.
Праз заступніцтва Найсвяцейшай Багародзіцы няхай благаславіць Вас Уселітасцівы Бог у адказным пастырскім служэнні кіраўніка Беларускай Праваслаўнай Царквы, якое Вы пачынаеце ў вельмі складаны час грамадска-палітычных патрасенняў, што перажывае наша Бацькаўшчына.
Я ўпэўнены, што як чалавек малітвы і дасведчаны пастыр Вы будзеце з годнасцю выконваць ускладзеную на Вас Божым Провідам функцыю наступніка Апосталаў у наш няпросты час.
Спадзяюся, што добрыя адносіны паміж Праваслаўнай Царквой і Каталіцкім Касцёлам, якія склаліся ў Беларусі дзякуючы намаганням Вашых дастойных папярэднікаў, знойдуць свой працяг на хвалу Госпада, дзеля збаўлення людзей і кансалідацыі нашага грамадства, у якім са старадаўніх часоў разам жывуць у міры і згодзе прадстаўнікі розных веравызнанняў.
З павагай і малітвай,
Арцыбіскуп Тадэвуш Кандрусевіч
Мітрапаліт Мінска-Магілёўскі
Старшыня Канферэнцыі Каталіцкіх Біскупаў у Беларусі
Мінск, 25 жніўня 2020 г.
