16 жніўня ў парафіі святога Андрэя, апостала, у Нарачы з удзелам Генеральнага вікарыя Мінска-Магілёўскай архідыяцэзіі біскупа Юрыя Касабуцкага ўрачыста адзначылі фэст у гонар святога Роха.
Гэтаму святому апекуну ад заразных хвароб у нарачанскім касцёле прысвечаны правы бакавы алтар, і ў парафіі традыцыйна ўспамін святога Роха адзначаецца як адпустовая ўрачыстасць.
Напярэдадні касцёл у Нарачы наведаў Мітрапаліт Мінска-Магілёўскі арцыбіскуп Тадэвуш Кандрусевіч, які разам з тутэйшымі вернікамі маліўся ва ўрачыстасць Унебаўзяцця Найсвяцейшай Панны Марыі.
У нядзелю цэлебрацыю ўрачыстай святой Імшы апоўдні ўзначаліў біскуп Юрый Касабуцкі. Падчас Эўхарыстыі група нарачанскіх вернікаў прыняла з рук іерарха сакрамэнт канфірмацыі.
Парафіяне шчыра павіншавалі пастыра з 50-гадовым юбілеем, які ён сёлета адзначае. З гэтай нагоды яму быў падараваны арыгінальны кандытарскі выраб — торт «50 гадоў шляхетнага жыцця, прысвечанага Богу».
Пасля Імшы адбылася малітва праз заступніцтва святога Яна Паўла ІІ і ўшанаванне яго рэліквій. Урачыстаму ўспаміну святога Роха ў парафіі папярэднічала Саракагадзіннае набажэнства.
