13 жніўня група мірных грамадзянаў, якія пратэставалі супраць насілля ў Беларусі, знайшлі прытулак у касцёле Езуса Міласэрнага ў Віцебску.
Як паведаміў карэспандэнт Sputnik, удзельнікі акцыі стаялі з кветкамі і шарыкамі каля касцёла. Калі побач з’явіліся аўтамабілі з супрацоўнікамі сілавых структур, служыцелі касцёла адчынілі браму і запрасілі людзей уваходзіць.
«Як святар і духоўны айцец я лічу сваім абавязкам быць там, дзе людзям пагражае небяспека. Яшчэ ўдзень я звярнуў увагу на тое, што каля касцёла стаіць моладзь, і выйшаў да іх, пазнаёміўся, даведаўся, адкуль, і запрасіў да нас: раптам камусьці спатрэбіцца адпачыць, схадзіць у прыбіральню або памаліцца», — распавёў карэспандэнту Sputnik канцлер Курыі Віцебскай дыяцэзіі ксёндз канонік Віктар Місевіч.
Знаходзячыся на тэрыторыі касцёла, сабраныя спявалі песні, некаторыя людзі раздавалі ўдзельнікам мірнай акцыі ваду і цукеркі. Каля паловы на дзявятую вечара віцябляне падзякавалі святарам і пайшлі далей.
Са старадаўніх часоў Касцёл дае права прытулку ўсім людзям без адрознення, якім пагражае небяспека.
У храмах і на прылеглай тэрыторыі ніхто не мае права здзяйсняць насілля супраць тых, хто мірна там знаходзіцца і просіць аб прытулку.
