У ліпені выйшлі ў свет новыя нумары папулярных у Касцёле на Беларусі каталіцкіх часопісаў.
Калі ўвесь свет перажывае неспакойны час, падборка матэрыялаў у новым нумары часопіса «Ave Maria» прысвечана тэмам, якія неадменна хвалююць кожнага: надзея, вера, смерць, месца чалавека ў свеце, пашана да чалавечага жыцця.
Пра становішча Касцёла падчас крызісу разважае кс. Андрэй Рылка ў рубрыцы «Святар адказвае на пытанне».
У рубрыцы «Споведзь» а. Аркадзь Куляха OCD тлумачыць значэнне збавеннай пакуты як неад’емнай часткі сакрамэнту пакаяння.
«З-за пыхі чалавек няздольны адкрывацца на праўду: стварае свой уласны свет, што таксама ўплывае на рэлігійныя ўяўленні, на малітву, і не згаджаецца, каб Бог вёў яго ў невядомае, у таямніцы» — гэтак перасцерагае чытачоў ад празмернага спадзявання на сябе а. Юрый Кулай OCD — аўтар рубрыкі «Школа малітвы».
Беларусь, як і ўвесь свет, знаходзіцца ў небяспецы пандэміі, і гэта не можа не выклікаць у людзей занепакоенасці, сумненняў, але таксама і вялікай ахвярнасці, узаемападтрымкі і любові. Тэме пандэміі прысвечана некалькі матэрыялаў гэтага нумара, у тым ліку — артыкул Дар’і Ахламёнак «Хадзіць ці не хадзіць — вось у чым пытанне», а таксама інтэрв’ю Кацярыны Дурко з хрысціянскім псіхолагам Юрыем Раманюком пра тое, як перажываць час пандэміі. Сваім досведам на гэтую ж тэму дзеляцца і нашыя чытачы.
Гэты Пастырскі год прысвечаны 100-годдзю з дня нараджэння св. Яна Паўла ІІ.
У летнім нумары «Ave Maria» апавядае пра парафію св. Яна Паўла ІІ у Смаргоні — першую парафію ў гонар Вялікага Папы, заснаваную ў Беларусі, а таксама друкуем разважанні святога Яна Паўла ІІ пра Эўхарыстыю і малітву.
Таксама ў нумары чытачы знойдуць літанію да святога сужэнства Луі і Зэлі Мартэн, бацькоў св. Тэрэзы з Лізьё, праз заступніцтва якіх мы просім Бога аб святасці сем’яў.
Калектыў часопіса «Ave Maria» разам з вернікамі выказвае словы падзякі і віншавання шаноўным біскупам і святарам, якія адзначаюць гэтым летам юбілей святарства.
Ім прысвечаныя паэтычныя віншаванні на старонках часопіса.
Не менш цікавым для чытача стане і летні нумар часопіса «Наша вера», у якім змешчаны матэрыялы мастацтвазнаўцаў, гісторыкаў, тэолагаў, мастакоў і пісьменнікаў.
Частка матэрыялаў нумару прысвечана асобе св. Яна Паўла ІІ. Яны пачынаюцца вершам Ірыны Багдановіч «Моліцца Папа…», напісаным аўтаркаю каля карцінаў выдатных беларускіх мастакоў Сяргея Шэмета і Алеся Марачкіна.
Далей друкуюцца: ліст папы Бэнэдыкта XVI «Да 100-годдзя з дня нараджэння святога папы Яна Паўла ІІ»; урыўкі з асабістых нататак Караля Вайтылы пад загалоўкам «Нішто нас не павінна палохаць…» у перакладзе Крыстыны Лялько і біблійнае разважанне з Янам Паўлам ІІ кс. Вальдэмара Храстоўскага — «Месца запаведзі „Шануй бацьку свайго і маці сваю“ ў Дэкалогу» ў перакладзе Марыны Пашук.
Тут жа змешчаны вершаваны трыпціх «Айчына» Ірыны Багдановіч і аўтарскае пасляслоўе да карціны «Я прашу вас, не згубіце Беларусь» мастака Алеся Марачкіна, твор якога друкуецца на вокладках часопіса.
550-годдзю аб’яўлення цудоўнага абраза Маці Божай Жыровіцкай прысвечана публікацыя Ірыны Багдановіч «Старонка рэлігійнай гісторыі Беларусі».
У ёй аўтарка прэзентуе працу гісторыка Валяр’яна Харкевіча (1890–1950) «Жыравіцы — ласкаў крыніцы…» у сваім перакладзе з польскай мовы.
Да 70-годдзя Беларускай праграмы Ватыканскага радыё друкуецца працяг нататкаў «Шляхам дзіваў і ўражанняў» (1934 г.) кс. Пятра Татарыновіча, які быў заснавальнікам гэтай праграмы.
Увазе чытачоў прапануецца ўрывак з дакументальнай аповесці вядомага беларускага паэта Леаніда Дранько-Майсюка «Усе бачылі нястачу віна…» (2020), прысвечанай выбітнаму беларускаму святару Адаму Станкевічу, тут жа друкуецца рэцэнзія на гэтую кнігу літаратуразнаўцы Ірыны Багдановіч.
У рубрыцы «Паэзія» публікуюцца вершы вядомых паэтаў Яна Чыквіна і Аксаны Данільчык.
Пісьменніца Алена Сямёнава-Герцаг працягвае знаёміць чытачоў з творчасцю нямецкага празаіка Георга Освальда Котта — гэтым разам яна пераклала на беларускую мову яго твор «Як з’явіўся Браўншвайгскі леў».
Уладзімір Сіўчыкаў друкуе свае новыя аўтабіяграфічныя нататкі пад назваю «Падымі мяне ў светлы абшар…».
Адной з найстарэйшых каталіцкіх святыняў прысвечаны артыкул гісторыка Святланы Адамовіч «Касцёл Святой Тройцы ў Радашковічах».
У рубрыцы «Мастацтва» друкуецца эсэ вядомага беларускага рэстаўратара Аркадзя Шпунта «Крывічы і ваколіцы».
Набыць часопісы можна:
- у парафіяльных кіёсках і ў пробашчаў парафій;
- альбо звяртайцеся ў рэдакцыю па тэл. +375 (17) 356 17 50
