1 жніўня ў санктуарыі Віцебскай дыяцэзіі ў Росіцы адбылася ўрачыстасць у гонар святароў мучанікаў, якія аддалі жыццё разам са сваімі парафіянамі падчас Другой сусветнай вайны.
Як адзначаецца на партале Сatholicnews.by, дзе можна паглядзець вялікі фотарэпартаж з Росіцы, сёлета з-за пандэміі каранавірусу ўрачыстасць прайшла ў скарочаным фармаце.
Яна распачалася з адарацыі Найсвяцейшага Сакрамэнту. У малітоўнай цішыні ўсе жадаючыя маглі прыступіць да споведзі на адкрытым паветры. Тым часам у касцёле адбывалася ружанцовая малітва, у якой разам з вернікамі ўзяў удзел і біскуп Віцебскі Алег Буткевіч.
Апоўдні адбылася святая Імша. На пачатку цэлебрацыі ксёндз Чэслаў Курэчка МІС, пробашч парафіі Святой Тройцы ў Росіцы, прывітаў усіх прысутных удзельнікаў.
«Мы хваляваліся, што сёлетнія ўрачыстасці з-за пандэміі будзем адзначаць у вузкім коле святароў. Але вы малайцы: не пабаяліся і прыбылі ў Росіцу.
Як росіцкія мучанікі ў свой час не пабаяліся паказаць прыклад веры, так і вы не пабаяліся сёння прыехаць», — адзначыў айцец Чэслаў.
Касцёл ва ўмовах пандэміі не арганізоўваў у гэтым годзе пілігрымак, але і не забараняў індывідуальныя. Айцец Чэслаў прывітаў пяцёх пілігрымаў з Наваполацка, якія прыехалі ў Росіцу на роварах, а таксама некалькіх пешых пілігрымаў, якія прыйшлі з Полацка. Сярод іх быў і ксёндз Ілля Саўчанка з Оршы, які зусім нядаўна прыняў святарскае пасвячэнне.
Глыбачанін Генадзь Бервячонак у адзіноце прайшоў шлях у 264 км з Барысава. Дарэчы, гэта ўжо другая яго самастойная пешая пілігрымка ў гэтым годзе: месяц таму ён пешшу прайшоў з Росіцы ў Будслаў.
На росіцкую ўрачыстасць сабралося больш за дзве сотні вернікаў, якія прыехалі з розных парафій Віцебскай дыяцэзіі, былі таксама пілігрымы з іншых дыяцэзій Беларусі, святары і сёстры законныя.
Літургію сваім спевам упрыгожыў хор з мёрскай парафіі.
Біскуп Алег Буткевіч напачатку прывітаў усіх вернікаў, падзякаваў ім за прысутнасць. «Няхай заступніцтва Божай Маці нам усім дапаможа!» — дадаў іерарх.
У сваёй гаміліі ён звярнуў увагу на каштоўнасць чалавечага жыцця, якая тут, у Росіцы, была так жорстка растаптаная.
«Прайшло не так шмат часу, крыху больш за семдзесят гадоў, і падлога святыні яшчэ памятае слёзы і малітвы тых людзей, што сталіся ахвярамі несправядлівасці, учыненай нацыстамі», — нагадаў іерарх.
«З гэтага месца людзі выходзілі на спатканне з Панам, — падкрэсліў біскуп. — Мы таксама ва ўсіх жыццёвых цяжкасцях павінны спадзявацца на Бога».
«Прыклад росіцкіх пакутнікаў можа быць нашай падтрымкай. Будзьма годнымі іх мужнага вызнання сваёй веры!» — заклікаў пастыр.
Пасля заканчэння Імшы адбылася працэсія да месца мучаніцкай смерці айцоў Антонія Ляшчэвіча і Юрыя Кашыры. Яны прынялі мучаніцкую смерць разам са сваімі вернікамі, хоць маглі пазбегнуць гэтага. Карнікі прапаноўвалі захаваць ім жыццё, але святары да канца падзялілі лёс сваіх парафіянаў.
Мясцовыя вернікі разам з пілігрымамі памаліліся за душы замучаных тут людзей, пасля чаго біскуп Алег Буткевіч звярнуўся да прысутных з кароткім словам.
«Тут была ўчынена несправядлівасць у яе найгоршай праяве: забойства нявінных людзей. Але мы прыходзім сюды не з нянавісцю, а каб навучыцца прабачаць», — сцвердзіў іерарх.
Напрыканцы святары і вернікі ўшанавалі крыж, усталяваны на месцы мучаніцкай смерці жыхароў Росіцы, і запалілі пры ім знічы на знак памяці.
