![](/3/images/news/2020/06/11713/2020-06-17-staneuski3-001.jpg)
17 чэрвеня, у 25-ю гадавіну з дня прыняцця прэзбітэрскага пасвячэння, Генеральны вікарый Гродзенскай дыяцэзіі біскуп Юзаф Станеўскі цэлебраваў Імшу падзякі за дар святарства ў катэдральнай базыліцы святога Францішка Ксавэрыя ў Гродне.
Напачатку цэлебрацыі са словам віншавання да юбіляра, сімвалічна апранутага ў прыгожы срэбраны арнат, звярнуўся біскуп Гродзенскі Аляксандр Кашкевіч.
Пастыр дыяцэзіі, які ў гэтай самай святыні 25 гадоў таму ўдзяліў Юзафу Станеўскаму сакрамэнт пасвячэння ў ступені прэзбітэрату, а 1 лютага 2014 года — у ступені епіскапату, вельмі цёпла адгукнуўся пра свайго найбліжэйшага супрацоўніка і памочніка ў кіраванні Касцёлам на Гродзеншчыне.
Павіншаваць біскупа Юзафа з юбілеем святарства прыбылі яго сабраты: Генеральны вікарый Мінска-Магілёўскай архідыяцэзіі біскуп Юрый Касабуцкі і Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB.
![](/3/images/news/2020/06/11713/2020-06-17-staneuski-003.jpg)
З іерархамі святую Імшу канцэлебравала вялікая колькасць святароў. У галоўнай святыні Гродзенскай дыяцэзіі разам маліліся дзясяткі вернікаў, і яшчэ каля сотні далучылася да супольнай малітвы дзякуючы анлайн-трансляцыі.
У прамоўленай гаміліі біскуп Юзаф Станеўскі разважаў пра сутнасць святарства, якую не перастае кожны дзень нанава для сябе адкрываць і праз 25 гадоў пасля пасвячэння.
Непрыканцы ўрачыстасці з віншавальным словам да юбіляра і прысутных звярнуўся біскуп Юрый Касабуцкі, які ў той час, калі яго сабрат стаў святаром, таксама праходзіў святарскую фармацыю ў гродзенскай Alma Mater. Павіншаваўшы біскупа Юзафа ад свайго імя, іерарх затым зачытаў віншаванне ад Старшыні Канферэнцыі Каталіцкіх Біскупаў у Беларусі Мітрапаліта Мінска-Магілёўскага арцыбіскупа Тадэвуша Кандрусевіча.
![](/3/images/news/2020/06/11713/2020-06-17-staneuski2-002.jpg)
У ім арцыпастыр, які трыццаць гадоў таму сярод першых кандытатаў прымаў Юзафа Станеўскага ў толькі што заснаваную ім у Гродне духоўную семінарыю, адзначае, што ахвярнае святарскае служэнне юбіляра было напоўнена пастырскім клопатам пра збаўленне людзей.
«Пастырскія, дыдактычныя і кіраўнічыя здольнасці, якімі Вы адзначаліся, разам з імкненнем да святасці жыцця былі высока ацэнены Святым Айцом Францішкам, які ў 2013 годзе прызначыў Вас біскупам. Актыўная дзейнасць у якасці наступніка апосталаў як у Гродзенскай дыяцэзіі, так і ў беларускім Касцёле, прывяла да выбару Вас Генеральным Сакратаром Канферэнцыі Каталіцкіх Біскупаў у Беларусі», — падкрэсліў кіраўнік беларускага каталіцкага епіскапату. Па словах арцыбіскупа, ён ганарыцца тым, што выпускнік першага набору гродзенскай семінарыі з’яўляецца не толькі вядомым святаром, але і папулярным сярод вернікаў, у тым ліку і моладзі, біскупам.
«Сваім святарскім і біскупскім служэннем Вы пацвярджаеце праўду, што святар з людзей выбраны і для людзей прызначаны ў Божых справах (пар. Гбр 5, 1). Адкрытасць, здольнасць аналізаваць канкрэтныя выклікі часу і на іх адказваць разам з глыбокім і адначасова даступным людзям абвяшчэннем Божага слова заслужана здабылі Вам добрую славу», — заўважыў арцыбіскуп Кандрусевіч.
Сваё віншаванне Старшыня ККББ завяршыў пажаданнем:
«Няхай Добры Бог праз заступніцтва Марыі, Маці святароў, надалей адорвае Вас патрэбнымі для далейшага паспяховага служэння дарамі і ласкамі, каб, згодна з дэвізам Вашага біскупскага служэння Evangelii gaudium (Радасць Евангелля), Вы з радасцю абвяшчалі вечна жывое і дзейснае Божае слова (пар. Гбр 4, 12), з якога нараджаецца патрэбная для збаўлення вера (пар. Мк 16, 15)».
Шмат шчырых віншаванняў і цёплых пажаданняў было скіравана ў гэты дзень біскупу Юзафу Станеўскаму. Ад імя кансэкраваных асобаў юбіляра павіншаваў кс. Віктар Гайдукевіч SDB, кіраўнік Каардынацыйнай групы вышэйшых настаяцеляў, дэлегатаў і прадстаўнікоў мужчынскіх і жаночых манаскіх інстытутаў і таварыстваў апостальскага жыцця ў Беларусі.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)