Несці дабро хворым, інвалідам, дзецям-сіротам, людзям, якія апынуліся ў цяжкай жыццёвай сітуацыі, — мэта Дабрачыннага каталіцкага таварыства Caritas. У маі і чэрвені часцінку братняй любові і клопату атрымалі і некаторыя жыхары Стаўбцоўшчыны.
Машыны з дапамогай ад Caritas Мінска-Магілёўскай архідыяцэзіі пабывалі ў Стоўбцах за гэты час тры разы.
Парафія святога Казіміра прыняла ўдзел у прапанаваным дабрачынным таварыствам праекце, мэтай якога стала падтрымка людзей з невялікім дастаткам, якія працуюць у сельскай гаспадарцы.
У выніку ў маі некалькі сем’яў з гэтай парафіі бясплатна атрымалі ў свае хатнія гаспадаркі бройлерных куранят і паўтарамесячных трусоў, якіх да гэтага часу ўжо змаглі падгадаваць.
Па просьбе пробашча парафіі ксяндза Ігара Лашука 10 чэрвеня дабрачыннае таварыства даставіла ў Стоўбцы сродкі аховы і дэзінфекцыі для цэнтральнай раённай бальніцы і тэрытарыяльнага цэнтра сацыяльнага абслугоўвання насельніцтва, а таксама прадуктовыя наборы і пакеты з бытавой хіміяй для людзей, якія апынуліся ў складанай жыццёвай сітуацыі, незалежна ад іх рэлігійнай, палітычнай і нацыянальнай прыналежнасці.
У раённую бальніцу і тэрытарыяльны цэнтр дапамога паступіла ў той жа дзень, а прадуктовыя наборы і пакеты з бытавой хіміяй атрымаюць некалькі шматдзетных сем’яў, бацькі дзяцей, якія наведваюць цэнтр карэкцыйна-развіваючага навучання і рэабілітацыі, і інваліды першай і другой груп.
Падчас пандэміі важкія скрынкі з прадуктамі і пакеты са сродкамі бытавой хіміі — добрая дапамога і прыемная нечаканасць для тых, хто іх атрымаў і атрымае.
Стаўбцоўскія парафіяне выказваюць сардэчную ўдзячнасць таварыству Caritas Мінска-Магілёўскай архідыяцэзіі, асабіста яго дырэктару айцу Андрэю Жылевічу OFMCap, усім яго памочнікам і валанцёрам за цеплыню сэрцаў і дабро, якое яны нясуць людзям, за веру ў лепшае і надзею, якую маюць людзі дзякуючы іх дзейнасці. Таксама яны ўдзячныя ксяндзу Ігару Лашуку за клопат, ініцыятыўнасць і духоўную апеку.
