Вялікдзень — заўсёды радаснае свята перамогі жыцця над смерцю. Нават у самых складаных абставінах вернікі спяваюць радаснае «Аллелюя» і вітаюць адно аднаго словамі «Хрыстус уваскрос».
Вялікдзень — самая вялікая хрысціянская ўрачыстасць. Яе святкаванне распачынаецца ўвечары ў Вялікую суботу.
На змярканні адбываецца галоўная літургічная цэлебрацыя Касцёла — Пасхальная вігілія.
Адчуць хвалюючую атмасферу таямніцы Уваскрасення і нанава яе перажыць нам дапаможа фотанарыс Віталія Палінеўскага са сталічнай парафіі святога Яна Евангеліста і святога Максімільяна Кольбэ.
Вялікдзень — урачыстасць, не абмежаваная адным днём. Яе непасрэднае святкаванне працягваецца восем дзён, якія складаюць актаву Пасхі.
Найчасцей раніцай у нядзелю перад святой Імшой на світанні адбываецца прыгожая Рэзурэкцыйная працэсія. Вернікі з радаснымі велікоднымі спевамі ідуць у ёй за сваім Уваскрослым Панам.
Тыя, хто сёлета з-за эпідэміі застаўся дома і не браў у ёй удзелу, могуць духоўна да яе далучыцца ў фотарэпартажы Віктара Ведзеня з мінскай парафіі святога Сымона і святой Алены — Чырвонага касцёла.
Вялікдзень — гэта адзін вялікі дзень новага стварэння, адроджанага ў пасхальнай таямніцы мукі, смерці і ўваскрасення Хрыста. Наш укрыжаваны Збаўца, зняты з крыжа і пахаваны, не застаўся ў цемры грабніцы. Ён сапраўды ўваскрос. Ён кліча нас за сабою.
Вялікдзень — гэта свята надзеі, якая ніколі не памірае.
