Выйшаў новы нумар часопіса «Наша вера», аўтары якога — мастацтвазнаўцы, гісторыкі, тэолагі, мастакі і пісьменнікі. Нумар можна набыць у кнігарні «Духоўная кніга», а таксама ў парафіяльных кіёсках.
Частка матэрыялаў гэтага нумару прысвечана постаці св. Яна Паўла ІІ. Яны пачынаюцца ўласным вершам Яна Паўла ІІ (Караля Вайтылы) «Калі думаю пра Айчыну» і працягваюцца Пастырскім пасланнем арцыбіскупа Тадэвуша Кандрусевіча «Не бойцеся! Адчыніце дзверы Хрысту!», а таксама размоваю Крыстыны Лялько з мастаком Сяргеем Шэметам, які напісаў каля дзясятка партрэтаў Вялікага Папы («Прыцяжэнне святасці»), — адзін з іх змешчаны на вокладцы часопіса.
Да 70-годдзя Беларускай праграмы Ватыканскага радыё друкуюцца нататкі «Шляхам дзіваў і ўражанняў» (1934 г.) кс. Пятра Татарыновіча, які быў заснавальнікам гэтай праграмы.
130-годдзю з дня нараджэння паэта і святара Казіміра Сваяка (Канстанціна Стэповіча) прысвечана публікацыя літаратуразнаўцы Ірыны Багдановіч «Біблія як крыніца паэтычнага натхнення Казіміра Сваяка».
Пра 4-ю запаведзь у навучанні Сіраха (3, 1–16) піша доктар тэалогіі Марына Пашук у матэрыяле пад назваю «Стаўленне да бацькі і маці».
Кандыдат псіхалагічных навук Яўген Маліноўскі прапануе ўвазе чытачоў свае разважанні над псіхалагічным ракурсам веры ў артыкуле «Патэрналісцкая падаплёка псіхалогіі веры».
У перакладзе з польскай мовы Юліі Шэдзько друкуецца інтэрв’ю М. Мюллера з гісторыкам Касцёла а. Томашам Галушкам ОР «Сэрца ў попеле» пра выбітную постаць св. Жанны д’Арк.
Журналіст Яраслаў Чапля ў артыкуле пад назваю «Параза» разважае пра драматычны шлях Касцёла падчас пераследу веры савецкімі ўладамі.
У рубрыцы «Пераклады» змешчаны вершы выбітнага польскага паэта Юліяна Тувіма ў перакладзе на беларускую мову С. Сяргея.
Літаратуразнаўца Анатоль Брусевіч у эсэ «Палёт за рамкі традыцыйнага» піша пра новую кнігу вершаў Дануты Бічэль-Загнетавай «Гускі вяртаюцца» (2019), друкуюцца таксама вершы паэткі.
У рубрыцы «Паэзія» друкуюцца вершы Ірыны Багдановіч.
Юлія Шэдзько ў артыкуле «Дасканалы Дзюрэр» піша пра нядаўнюю выставу творчасці знакамітага мастака ў Вене, дзе ёй давялося пабываць.
Эла Дзвінская прысвяціла свой матэрыял «Доктар Скот Кэрал і Музей Бібліі ў Вашынгтоне» асобе доктара Кэрала, які ў верасні 2018 г. быў адным з арганізатараў выставы «Беларусь і Біблія» ў Мінску.
Вядомы рэстаўратар і калекцыянер Ігар Сурмачэўскі ў артыкуле «Лёс прыватных калекцый на Беларусі ў XVI–XX стст.» разважае пра страчаную і захаваную культурна-рэлігійную спадчыну.
70-годдзю выдатнага беларускага мастака Кастуся Качана прысвечана эсэ Лідзіі Камінскай «Пра „Сароку над гумном“ і вечную „Дарогу дамоў“».
Эла Дзвінская ў артыкуле «Дойлід, які прысвяціў свой талент сакральным забудовам» піша пра архітэктара Аляксандра Базевіча і яго святыні.
Набыць часопіс можна:
- у кнігарні «Духоўная кніга» (г. Мінск, вул. Багдановіча, 25, пн–пт: 10.00–19.00, сб.: 11.00–17.00);
- у парафіяльных кіёсках і пробашчаў парафій;
- альбо звяртайцеся ў рэдакцыю па тэл. +375 17 356 17 50.
Пра мінулыя нумары часопісаў «Наша вера» і «Ave Maria» чытайце ТУТ.
