У перыяд Вялікага посту ў парафіях ладзяцца рэкалекцыі, якія дапамагаюць глыбей пазнаць сутнасць гэтага перыяду і пакаяння, падрыхтаваць душу да перажывання Пасхальнага Трыдууму. З 26 па 29 лютага для супольнасці Міждыяцэзіяльнай вышэйшай духоўнай семінарыі ў Гродне таксама прайшлі велікапосныя рэкалекцыі.
Правёў рэкалекцыі пробашч парафіі Спаслання Духа Святога ў Барысаве кс. канонік Аляксей Раманчук. Рэкалекцыяніст прапанаваў семінарыстам засяродзіцца над значнымі рэчамі, якія павінны прысутнічаць у жыцці кожнага святара: устрыманасць, чыстасць, маўчанне, малітва, прабачэнне і пакора.
Таксама кс. Аляксей засяродзіў увагу на чатырох тыпах фармацыі святара: агульначалавечай, інтэлектуальнай, духоўнай і пастырскай.
Між іншым ён падзяліўся сваім досведам перажывання семінарыйных гадоў і быцця святаром.
Засваенню пачутых навук і канферэнцый спрыяла ціхая і спакойная атмасфера: на працягу рэкалекцый будучыя святары павінны былі захоўваць маўчанне. У плане духоўных практыкаванняў былі штодзённая Эўхарыстыя і Літургія гадзінаў, Крыжовы шлях, Песні жальбы, пакутнае набажэнства і адарацыя Найсвяцейшага Сакрамэнту.
