Kаманда святароў Гродзенскай дыяцэзіі, якая прадстаўляла Беларусь, стала 7-й на XIV Чэмпіянаце Еўропы сярод каталіцкіх святароў па міні-футболе. Чэмпіянат праходзіў з 17 па 21 лютага ў сталіцы Чэхіі Празе.
Як паведамляе партал Grodnensis.by, першае месца заняла каманда Польшчы, другое — Босніі i Герцагавіны, трэцяе — Партугаліі.
Капітан беларускай каманды кс. Дзяніс Бразінскі адзначыў, што гэта добры вынік для яе на чэмпіянаце, бо некаторыя каманды маюць сапраўды высокі ўзровень падрыхтоўкі і гуляюць як прафесіяналы.
У мінулым годзе беларуская каманда заняла 12-е месца на гэтым чэмпіянаце, які праходзіў у Ульцыне ў Чарнагорыі ля вусця ракі Баяны каля мяжы з Албаніяй, над Адрыятычным морам.
Турнір па міні-футболе сярод святароў быў ініцыяваны духавенствам Аўстрыі. Першы чэмпіянат прайшоў у 2004 годзе ў Айзенштаце.
У сёлетнім турніры ўдзельнічала больш за 250 чалавек з 18 каманд.
З Беларусі ўдзельнічалі святары Гродзенскай дыяцэзіі, прадстаўнікі Віцебскай і Пінскай дыяцэзій — у цэлым 13 святароў.
Чэмпіянат стаў таксама часам інтэграцыі духавенства і магчымасцю сустрэцца са святарамі іншых краін. Праграма ўключала канферэнцыі на тэмы, якія датычылі духоўных каштоўнасцяў у спорце, супольную малітву са штодзённай святой Імшой і наведванне гістарычнай Прагі.
