2 лютага, у свята Ахвяравання Пана, у парафіі Узвышэння Святога Крыжа ў Шаркаўшчыне адбылася адарацыя Найсвяцейшага Сакрамэнту, ініцыятарам якой выступіла моладзь.
Падчас адарацыі вернікі рознага ўзросту ў ціхай малітве шукалі адказаў на пытанні: якое маё жыццё з Богам? чаму жыццё не можа быць чарадою адных поспехаў? што я зрабіў на карысць свайго бліжняга, а не дзеля сваёй карысці? якім сваім учынкам я пакрыўдзіў Езуса?
2 лютага Каталіцкі Касцёл адзначае таксама дзень кансэкраванага жыцця.
Таму падчас адарацыі вернікі маліліся за кансэкраваных асобаў, дзякуючы Богу за тых, хто прысвяціў сваё жыццё служэнню Яму і людзям.
Маладыя парафіяне разам з пробашчам кс. Максімам Бачарнікавым падрыхтавалі песні і тэксты-разважанні.
Пасля заканчэння набажэнства шмат вернікаў выказалі словы ўдзячнасці моладзі за падрыхтоўку адарацыі.
