Пошук

29.01.2020 10:41   Catholic.by
Фота wikimedia.com

28 студзеня ў капліцы Божай Міласэрнасці ў вёсцы Свяцк Гродзенскага раёна (сапоцкінская парафія Унебаўзяцця Найсвяцейшай Панны Марыі і святога Язафата Кунцэвіча) адбылося загаранне.

Па звестках Гродзенскага абласнога ўпраўлення МНС, сігнал пра загаранне ў капліцы паступіў на пульт у аўторак, 28 студзеня, у 16.55. Паведамляецца, што ў выніку загарання часткова знішчаны прадметы інтэр’еру, падлога на плошчы шэсць квадратных метраў, закураны сцены і столь. Ніхто з людзей не пацярпеў.

Як паведаміў Catholic.by пробашч парафіі ў Сапоцкіне ксёндз Антоній Абухоўскі, які здзяйсняе душпастырскую апеку над вернікамі ў вёсцы Свяцк, Найсвяцейшы Сакрамэнт у капліцы не захоўваўся.

Культавы будынак ХІХ стагоддзя не належыць парафіі, а з’яўляецца часткай палацава-паркавага комплексу Валовічаў, які знаходзіцца ва ўласнасці санаторыя «Азёрны». Набажэнствы ў капліцы ў Свяцку, якую вернікі арандуюць, адбываюцца толькі ў нядзелі і святы.

Апошні раз святая Імша цэлебравалася тут у нядзелю 26 студзеня, больш за двое сутак да загарання.

Прычына загарання ў капліцы не высветлена.

Звяртаемся да ўсіх неабыякавых з просьбай аб малітве і духоўнай падтрымцы вернікаў вёскі Свяцк, каб надзвычайная сітуацыя не пазбавіла іх магчымасці рэгулярнага ўдзелу ў святой Імшы і іншых сакрамэнтах Касцёла.

Абноўлена 29.01.2020 12:24
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа