26 студзеня, у Нядзелю Божага слова, якая сёлета адзначалася ўпершыню, Генеральны вікарый Мінска-Магілёўскай архідыяцэзіі біскуп Юрый Касабуцкі наведаў парафію святога Антонія ў Слуцку, каб разам з вернікамі засяродзіцца над таямніцай нараджэння Езуса Хрыста — Слова, якое сталася Целам і пасялілася між намі.
Згодна з францішканскай традыцыяй, кожны год у касцёле св. Антонія намаганнямі айцоў францішканаў і сясцёр ядвіжанак, якія тут служаць, будуюцца вялікія бэтлеемскія яслі, якія дапамагаюць вернікам дакрануцца да таямніцы Божага ўцелаўлення. Многія жыхары Слуцка, а таксама госці з іншых мясцін прыязджаюць пабачыць яслі і перажыць Божае Нараджэнне.
Штогод батлейку ў Слуцку наведвае таксама біскуп Юрый Касабуцкі.
Супольная малітва з іерархам заўсёды ўмацоўвае веру парафіянаў, а пачутыя словы гаміліі нанава абуджаюць у сэрцах надзею і распальваюць агонь любові да Бога і бліжніх.
Вернікі парафіі св. Антонія вельмі ўдзячныя біскупу за прысутнасць, малітву і абвяшчэнне Божага слова.
