22 студзеня ў парафіі святога Антонія ў Магілёве прайшла пастырская сустрэча духавенства Магілёўскага рэгіёну Мінска-Магілёўскай архідыяцэзіі.
Адметнай рысай сустрэчы было тое, што гэтым разам яна адбылася ў іншым фармаце, чым звычайна. Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB прапанаваў прысутным паразважаць над сутнасцю свайго святарства і манаства ў канкрэтнай рэчаіснасці гэтага рэгіёну.
Сустрэча пачалася супольнай малітвай Літургіі Гадзінаў.
Пасля духоўны айцец Магілёўскага рэгіёну кс. канонік Андрэй Далянскі прамовіў канферэнцыю на тэму «Сталая фармацыя», затрымаўшыся на фармальным і асабістым вымярэнні фармацыі.
Фармальным вымярэннем святар назваў агульны клопат Касцёла пра пастырскую фармацыю, усе дакументы, канферэнцыі, навучанне Касцёла і гэтак далей; асабістым вымярэннем — асабісты клопат пра ўласнае збаўленне. Першае вымярэнне датычыцца агульнага развіцця. Па словах кс. Андрэя Далянскага, гэта тое, пра што піша св. Павел у першым Пасланні да Цімафея. Другое вымярэнне, як патлумачыў святар, — гэта клопат пра сваё сумленне.
Наступным пунктам сустрэчы стала праца ў групах. Перад яе пачаткам біскуп Аляксандр Яшэўскі заахвоціў сабраных вызначыць перспектывы на будучыню, каб зрабіць аналіз сваіх моцных і слабых бакоў дзеля вызначэння перспектываў і напрамкаў дзеяння. Таксама іерарх звярнуў увагу на неабходнасць паразважаць над тым, што можа быць небяспекай і рызыкай у святарскім і манаскім жыцці.
Біскуп нагадаў словы Папы Францішка, які падчас сваіх апостальскіх падарожжаў, сустракаючыся са святарамі і кансэкраванымі асобамі, звяртае ўвагу на тры словы: убачыць, ацаніць, дзейнічаць.
Менавіта ў ключы гэтых словаў Біскупскі вікарый бачыў працу святароў і сясцёр законных у групах падчас гэтай сустрэчы. Святары былі падзелены на тры групы, сёстры склалі чацвёртую групу. Кожны атрымаў картку з чатырма рубрыкамі, у якіх найперш належала затрымацца над трыма пытаннямі:
- Як я перажываю сваё святарства / кансэкраванае жыццё ў рэчаіснасці Магілёўскага рэгіёну;
- У чым сутнасць майго святарства / кансэкраванага жыцця;
- Што раблю, каб маё святарства / кансэкраванае жыццё было плённым.
Пасля асабістага разважання над гэтымі пытаннямі святары і кансэкраваныя асобы падзяліліся між сабой сваімі адказамі і прыйшлі да агульных высноваў. Потым групы сабраліся разам, і прадстаўнік кожнай з іх прадставіў тое, што з’яўляецца моцнымі і слабымі бакамі ў жыцці святара або кансэкраванай асобы, што на сённяшні момант можа і павінна быць выклікам, а што можа быць рызыкай і прынесці небяспеку.
Біскуп прапанаваў вызначыць агульныя для ўсіх высновы, каб лепш і больш асэнсавана быць святарамі і кансэкраванымі асобамі ў магілёўскай рэчаіснасці.
Прысутныя прыйшлі да высновы, што:
- Моцнымі бакамі з’яўляюцца: адзінства, якое праяўляецца ў духоўным жыцці; падтрымка адзін аднаго; служэнне Богу і людзям; шчырасць.
- Слабымі бакамі з’яўляюцца: адзінота, якая вынікае з пачуцця пакінутасці; непадрыхтаванасць да спецыфічнага місійнага служэння на Магілёўшчыне; перажыванне стэрэатыпу «святары другой катэгорыі».
- Перспектывы і выклікі — евангелізацыя і катэхізацыя; большае пачуццё адказнасці за парафіяльную супольнасць і людзей; фармацыя на асабістым узроўні; фармацыя на розных узроўнях служэння (да 5 гадоў святарства, ад 5 да 10 гадоў, пробашчаў і г.д.); ратацыя (напрыклад, пасада пробашча на 7 гадоў).
- Небяспекі і рызыка — гэта: «выгаранне» ў няпростых абставінах служэння; усялякага роду залежнасці; усё больш свецкі стыль жыцця; самаізаляцыя; наступства папярэдняга — адыход ад святарства / манаскага жыцця.
Біскуп Аляксандр Яшэўскі, які быў ініцыятарам і мадэратарам такой формы сустрэчы, сардэчна падзякаваў за водгук, актыўны ўдзел і, што самае важнае, за шчырасць і сталасць у прапанаванай тэматыцы. Ён адзначыў, што сёлета будзе пятая гадавіна яго біскупскага пасвячэння і служэння на Магілёўшчыне. Таму для яго вельмі важна супольна з духоўнымі асобамі гэтага рэгіёну паглядзець, ацаніць і вызначыць напрамкі дзейнасці і для свайго біскупскага служэння.
Гэтая сустрэча, па словах іерарха, паказала, што яны маюць неабходнасць умець размаўляць шчыра, сумленна аналізаваць, вырашаць праблемы і цяжкасці, бачыць здзейсненае дабро і вызначаць перспектывы.
Наступная пастырская сустрэча духоўных асобаў Магілёўскага рэгіёну адбудзецца ў парафіі Божай Міласэрнасці ў Асіповічах 19 лютага.
