15 студзеня ксёндз Юрый Бяганскi, кусташ санктуарыя Гродзенскай дыяцэзіі Маці Божай Тракельскай, Каралевы нашых сем’яў, благаславiў малітоўную групу касцёльнага руху «Маці ў малітве», якая будзе дзейнічаць пры тутэйшай парафіі.
Вестка пра гэта з’явілася на старонцы санктуарыя ў сацыяльнай сетцы Вк.
Рух «Маці ў малітве» быў заснаваны ў Англіі ў 1995 годзе Веронікай Уільямс. Цяпер гэта 75-гадовая маці і бабуля, якая, перад абліччам пагрозаў сучаснага свету, адчула заклік да асаблівай супольнай малітвы, у якой маці давяраюць сваіх дзяцей і ўнукаў Езусу.
Рух «Маці ў малітве» сёння дзейнічае больш як у 100 краінах свету, у тым ліку і ў Беларусі.
Ён распаўсюджваецца дзякуючы асабістым кантактам і сведчанням маці. Духоўнасць руху характарызуецца поўным даверам Богу, радаснай паслухмянасцю Яму і Касцёлу.
Сведчанні з усяго свету пацвярджаюць, што малітвы маці Бог выслухоўвае і дае дзецям вялікія ласкi: здароўе, ацаленне ад залежнасцяў, нараджэнне доўгачаканых дзетак.
