12 студзеня завяршыўся Першы фестываль мастацтваў «Раство з Капуцынамі», які праводзіўся ў Мінску па ініцыятыве братоў капуцынаў са сталічнай парафіі святога Францішка.
У межах фестывалю адбыліся тры канцэрты, кожны з якіх быў па-свойму асаблівым.
Першымі праславілі нараджэнне Хрыста ўдзельнікі хору Transitus з мінскай парафіі святога Францішка. Гэты касцёльны калектыў, заснаваны ў верасні мінулага года, складаецца з трох груп: жаночага хору, дзіцячага хору і інструментальнага ансамблю. У рэпертуар хору, мастацкім кіраўніком якога з’яўляецца Вераніка Раманенкава, уваходзяць творы беларускай музыкі: як старажытнай, так і сучаснай.
Канцэртны выступ парафіяльнага хору праходзіў пад назваю «Пад зоркай Бэтлеемскай».
Канцэртнае выступленне хору Transitus завяршылася кранальным выкананнем песні «Люлі, мой Езусе». Пад гэты прыгожы калядны спеў-калыханку мамы з немаўляткамі на руках пяшчотна люлялі сваіх дзетак, а маленькія харысты калыхалі фігуру Дзіцяткі Езуса.
Назва другога фестывальнага канцэрту гучала як пажаданне: «Вясёлых калядных святаў». Спевакі Алесь Чумакоў і Таццяна Ячная пад гуслі выканалі еўрапейскія калядкі ў перакладзе на беларускую мову. Такі рэдкі музычны інструмент, як гуслі, надае калядным песням непаўторны каларыт.
Алесь Чумакоў грае на адзінаццаціструнных крылападобных гуслях. Такія гуслі — адзін з найбольш распаўсюджаных тыпаў традыцыйных гусляў, вядомы са старажытнасці на тэрыторыі Беларусі.
У ХVI стагоддзі падобныя гуслі ўзгадваў у прадмове да «Псалтыра» першадрукар Францішак Скарына.
Назва трэцяга канцэрту абвяшчала добрую навіну: «Хрыстус нарадзіўся».
Святочную музычную праграму прадставілі Ірына Бацян, Міхаіл Ваўчкоў, Ірына Горская і ўзорны аматарскі калектыў народнай музыкі «Бараўлянская крынічка» пад кіраўніцтвам Аліны Горскай. Удзельнікамі ансамбля з’яўляюцца вучні розных аддзяленняў Бараўлянскай дзіцячай школы мастацтваў ва ўзросце ад 6 да 16 гадоў. Рэпертуар калектыву складаюць апрацоўкі беларускіх народных песень, а таксама інструментальная музыка.
Магутнае і глыбокае гучання баяна на канцэрце неверагодным чынам нагадвала гукі сапраўднага аргана, а цымбалы ў чарговы раз «даказалі» слухачам, што гэта ўніверсальны інструмент і што на ім аднолькава цудоўна можна зайграць і класічныя творы еўрапейскай музыкі, і народныя песні.
Фестываль «Раство з капуцынамі» стаў заўважнай падзеяй у касцёльным жыцці і заззяў новаю зоркаю на музычным небасхіле беларускай сталіцы, якая абвяшчае нашым суайчыннікам добрую навіну аб Нараджэнні Збаўцы.
