1 студзеня ксёндз прэлат Юзаф Трубовіч, які з’яўляецца найстарэйшым каталіцкім святаром у Беларусі, адзначаў свой 94-ы дзень нараджэння.
Як паведаміў партал Grodnensis.by, з гэтай нагоды ў гродзенскім касцёле Беззаганнага Зачацця Найсвяцейшай Панны Марыі, дзе нясе служэнне святар-ветэран, адбылася ўрачыстая святая Імша.
Духавенства і шматлікія вернікі, якія ўзялі ўдзел у набажэнстве, выказалі ксяндзу Юзафу сардэчныя віншаванні і падзяку за вернае служэнне і прыклад самаахвярнасці.
«Богу няхай будзе падзяка за тое дабро, якое спазнаю на працягу ўсяго свайго жыцця», — сказаў ксёндз прэлат, узгадаўшы 63 гады служэння ў Латвіі і Беларусі.
Святар дадаў, што заўсёды кіраваўся дабром людзей, якім жадаў служыць ад усяго сэрца. Ён падкрэсліў, што заўсёды цешыўся, калі бачыў вернікаў, якія ўдзельнічаюць у жыцці сваёй парафіяльнай супольнасці.
Ксёндз Юзаф Трубовіч падзякаваў усім тым, хто сёння прымае актыўны ўдзел у жыцці сваіх парафій і такім чынам спрыяе справе евангелізацыі.
На заканчэнне святой Імшы найстарэйшага святара ў Беларусі павіншавалі наймалодшыя парафіяне.
