Напярэдадні Адвэнту, у суботу 30 лістапада, вернікі рознага ўзросту сабраліся на чацвёрты хрысціянскі баль ў парафіяльным доме імя айца Францішка Ярдана, які дзейнічае пры санктуарыі Маці Божай Браслаўскай, Валадаркі Азёраў.
Як паведаміў сайт санктуарыя Waladarka.by, у межах традыцыйных «Андрэек» тут была арганізавана забаўляльная праграма з жывой музыкай і выступам сапраўднага ілюзіяніста.
На пачатку імпрэзы усіх прывітаў ксёндз Уладзімір Шыдлоўскі, які пажадаў у Божай радасці бавіць час, каб пасля, у штодзённым жыцці, асабліва падчас Адвэнту, дзяліцца радасцю з іншымі.
Свята адкрыла шоў фокусніка. Яго майстэрства прываблівала ўсіх прысутных, здзіўляла, забаўляла і адначасова ўздымала настрой. Потым распачаліся танцы з разнастайнымі забавамі, конкурсамі і латарэяй. Доўгі час сваім выступленнем прысутных радавала моладзь парафіяльнага гурта «Ex anima».
На свята ў госці да браслаўчанаў завітала моладзь з Друі і з віцебскай парафіі Святога Духа.
Браслаўскі хрысціянскі баль — гэта не толькі нагода весела правесці час «запустаў» перад Адвэнтам, але і цудоўная магчымасць, каб вернікі лепш пазнаёміліся і здружыліся паміж сабою.
