Перад пачаткам новага літургічнага года ў Вышэйшай духоўнай семінарыі ў Гродне адбыліся «Андрэйкі».
Як паведамляе Прэс-служба Гродзенскай дыяцэзіі, у зале святога Яна Паўла ІІ сабраліся студэнты і кіраўніцтва семінарыі на чале з рэктарам ксяндзом канонікам Віталіем Вайцяхоўскім.
Студэнты 2 і 4 курсаў паклапаціліся аб тым, каб мерапрыемства прайшло весела. Традыцыйная сустрэча ўключала розныя конкурсы, сцэнкі і іншыя забаўляльныя актыўнасці.
Такім чынам семінарысты распачалі Адвэнт, большую частку якога яны правядуць у малітве і вучобе. Таксама навучэнцы плануюць далучыцца да разнастайных справаў міласэрнасці, якія на працягу некалькіх гадоў здзяйсняе супольнасць семінарыі.
Старэйшыя студэнты гэтай навучальнай установы, якія ўжо маюць сутаны, у межах семінарыйнай практыкі ў перыяд Адвэнту ўключацца ў жыццё парафіі, удзельнічаючы ў нядзельнай Эўхарыстыі і іншых набажэнствах.
