Пошук


21.11.2019 15:48   Тэкст: Мікола Гракаў / Фота: Кс. Аляксандр Улас / Catholic.by

21 лістапада ў касцёле святога Яна Хрысціцеля, што ў сталічным мікрараёне Серабранка, прайшла чарговая сустрэча духавенства і кансэкраваных асобаў Мінскай вобласці.

Пасля супольнай малітвы Літургіі Гадзінаў да сабраных звярнуўся ксёндз Ігар Лашук, які распавёў пра нябеснага Апекуна Касцёла на Беларусі святога Міхала Арханёла і пра перэгрынацыю яго фігуры з італьянскага санктуарыя ў Гаргана, што цяпер адбываецца па парафіях нашай краіны.

Цэлебрацыю святой Імшы ў межах дня засяроджання ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі. У прамоўленай гаміліі іерах звярнуў увагу душпастыраў на неабходнасць лепш распазнаваць знакі часу.

«Мінуў час адраджэння Касцёла — настаў час душпастырства. Трэба быць бліжэй да вернікаў, да парафіянаў і больш шчыльна супрацоўнічаць з імі», — падкрэсліў біскуп Касабуцкі.

Ён таксама правёў арганізацыйную частку сустрэчы, падчас якой былі абмеркаваны бягучыя пытанні жыцця мясцовага Касцёла і пастырскія планы на бліжэйшую будучыню. Перадусім біскуп падзякаваў святарам за наведванне могілак і спецыяльныя набажэнствы падчас актавы малітваў за памерлых.

Іерарх нагадаў, што 22 лістапада ў Вільні адбудзецца перапахаванне парэшткаў нацыянальнага героя Беларусі Кастуся Каліноўскага і іншых удзельнікаў вызвольнага паўстання 1863–1864 гг. У цырымоніі перапахавання бярэ ўдзел Мітрапаліт Мінска-Магілёўскі арцыбіскуп Тадэвуш Кандрусевіч, які ўзначальвае беларускую касцёльную дэлегацыю, у якую ўвайшлі таксама Апостальскі візітатар для грэка-католікаў Беларусі архімандрыт Сяргей Гаек, пяць святароў лацінскага абраду і трое грэка-каталіцкіх прэзбітэраў.

Паколькі 1 снежня распачынаецца Адвэнт — час радаснага чакання прыйсця Збаўцы і падрыхтоўкі да ўрачыстасці Божага Нараджэння, — біскуп Юрый Касабуцкі заахвоціў святароў арганізоўваць рэкалекцыі і спецыяльныя набажэнствы для вернікаў у гэты асаблівы літургічны перыяд.

На заканчэнне сустрэчы Генеральны вікарый звярнуў увагу ўдзельнікаў на тое, што 29 снежня, у свята Святой Сям’і, у Касцёле на Беларусі завершыцца пастырскі год, прысвечаны сям’і як радасці і надзеі моладзі. Дэвіз наступнага пастырскага года, прысвечанага святому Яну Паўлу ІІ, — «Адчыніце дзверы Хрысту».

    

 

Абноўлена 21.11.2019 18:57
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.