Па рашэнні Канферэнцыі Каталіцкіх Біскупаў нашай краіны 2019 год у Касцёле на Беларусі быў абвешчаны годам сям’і, які праходзіць пад дэвізам дэвізам: «Сям’я — крыніца радасці і надзеі моладзі».
Ва ўсіх душпастырскіх мерапрыемствах з удзелам вернікаў духоўныя пастыры звярталі асаблівую ўвагу на крызіс сямейных каштоўнасцяў, які стаў сур’ёзным выпрабаваннем для сем’яў у нашай краіне.
Аборты, разводы, метады так званага «планавання сям’і», нязгодныя з годнасцю чалавека і вучэннем Касцёла, распаўсюджванне дэструкцыйнай гендарнай ідэалогіі, спалучанае з прапагандай сексуальнай разбэшчанасці і палавых ненармальнасцяў (ЛГБТ), — усё гэта вядзе да разбурэння традыцыйнага, Богам створанага інстытуту сям’і і спіхвае нашае грамадства ва ўсё больш глыбокую «дэмаграфічную яму», да паступовага вымірання.
Адчуваючы сваю адказнасць за будучыню Беларусі і яе народа, каталіцкія біскупы прыкладаюць усе намаганні для таго, каб звярнуць увагу на неабходнасць абараніць беларускую сям’ю ад шкодных разбуральных уплываў.
Завяршэнне пастырскага года сям’і адбудзецца ў свята Святой Сям’і, якое Касцёл будзе адзначаць у нядзелю 29 снежня.
З гэтай нагоды ў мінскім касцёле св. Сымона і св. Алены (Чырвоны касцёл) у 11.00 Старшыня Канферэнцыі Каталіцкіх Біскупаў у Беларусі арцыбіскуп Тадэвуш Кандрусевіч узначаліць цэлебрацыю святой Імшы, у якой возьмуць удзел прадстаўнікі ўсіх касцёльных супольнасцяў і рухаў, так ці інакш звязаных з душпастырствам сем’яў.
Пасля святой Імшы адбудзецца традыцыйнае дзяленне каляднай аплаткай з сем’ямі, а таксама з прадстаўнікамі касцёльных сямейных рухаў і тымі, хто займаецца душпастырствам сем’яў.
