Як было паведамлена 21 лістапада на пастырскай сустрэчы духавенства і кансэкраваных асобаў Мінскай вобласці, трансляцыю ўрачыстай святой Імшы Пастэркі на Божае Нараджэнне сёлета плануецца правесці з санктуарыя Маці Божай Фацімскай у Жодзіне.
Святая Імша ў ноч Нараджэння Пана традыцыйна называецца «Пастэркай» ад лацінскага слова pastor — пастух, бо менавіта простыя хлопчыкі-пастушкі першымі даведаліся пра нараджэнне ў Бэтлееме Месіі — Хрыста, Збаўцы свету, і прыйшлі Яму пакланіцца, несучы свае сціплыя сялянскія дары. У касцёл вернікі збіраюцца пасля вігілійнай вячэры ў сваіх дамах, так званай куцці, якая традыцыйна складаецца з посных страваў, а распачынаецца дзяленнем аплаткай — прэсным хлебам, падобным да хлеба, які ў Эўхарыстыі ператвараецца ў Цела Хрыста.
Традыцыйна Белтэлерадыёкампанія і Першы канал Беларускага тэлебачання, а таксама тэлеканал «Мір» вядуць прамую трансляцыю ўрачыстай святой Імшы Пастэркі, каб да яе магло далучыцца як мага больш вернікаў, асабліва тых, хто з важных прычын не можа быць у касцёле.
Пачатак трансляцыі 24 снежня ў 21.45.
