З 4 па 6 лістапада міністранты з розных парафій Пінскай дыяцэзіі бралі ўдзел у фармацыйнай сустрэчы, якая праходзіла ў сценах духоўнай семінарыі ў Пінску. Адказным за яе правядзенне быў кс. Юрый Пракапюк, якому дапамагалі семінарысты.
У цёплай братэрскай атмасферы міністранты мелі магчымасць удзельнічаць у тэарэтычных і практычных занятках, а таксама на некалькі дзён увайсці у рытм семінарыйнага жыцця.
Гэты рытм быў напоўнены канферэнцыямі, малітвамі Літургіі гадзінаў, адарацыяй Найсвяцейшага Сакрамэнту са спевам і супольным перажываннем Ахвяры святой Імшы.
Адным з цікавых момантаў сталі адкрытыя лекцыі па гісторыі Касцёла, дагматыцы, калі міністранты маглі пазнаёміцца з выкладамі тэалагічнай навукі, якую вывучаюць семінарысты. Таксама была адкрытая лекцыя па этыцы, якая адрозніваецца філасофскім напрамкам.
Арганізатары сустрэчы жадаюць, каб гэты досвед не застаўся толькі ў мінулым, а дапамог удзельнікам у тым, каб прыносіць плён свайго служэння ў родных парафіях.
