У нядзелю 13 кастрычніка ў парафіі святога Юды Тадэвуша ў Вішневе (Смаргонскі дэканат) прайшло апошняе ў гэтым годзе Фацімскае набажэнства ў інтэнцыях вернікаў.
Вернікі вішнеўскай парафіі разам са сваім пробашчам ксяндзом Антоніем Казлоўскім кожны трынаццаты дзень месяца з мая па кастрычнік збіраюцца ў сваёй парафіяльнай святыні на набажэнствы, якія складаюцца са святой Імшы і Фацімскага Ружанца.
Несучы ў працэсіі вакол касцёла фігуру Маці Божай Фацімскай, удзельнікі набажэнства моляцца Ружанец з малітвамі, якія былі аб’яўлены ў Фаціме.
Падчас працэсіі цудоўны хор вішнеўскіх парафіянак спявае кароткія песні-разважанні, якія ўводзяць у духоўны сэнс кожнай таямніцы. Прамаўляючы цотныя таямніцы, удзельнікі набажэнства высока ўзнімаюць рукі ўгору, молячы Бога праз заступніцтва Панны Марыі аб усіх патрэбных ласках для сябе, для сваіх сем’яў, для родных і блізкіх, для нашай Бацькаўшчыны і ўсяго свету.
Фацімскія набажэнствы ў Вішневе, якія зазвычай збіраюць духавенства і вернікаў з усяго наваколля, зноў распачнуцца 13 мая наступнага года.
