28–29 верасня ўдзельнікі Душпастырства студэнтаў і старэйшай моладзі OPEN, якое дзейнічае ў Гродне, наведалі санктуарый Маці Божай Яснагорскай Цярпліва Слухаючай на Узгорку Надзеі ў Капцёўцы, дзе правялі малітоўнае чуванне.
Як паведаміў партал Grodnensis.by, чуванне моладзі стала выразам падзякі Богу за дар душпастырства, якое з пачаткам новага навучальнага года распачало ўжо чатырнаццаты год сваёй дзейнасці ў горадзе на Нёмане.
Юнакоў і дзяўчат суправаджаў кс. канонік Антоні Грэмза, адказны за душпастырства OPEN. Ён цэлебраваў у санктуарыі святую Імшу ў інтэнцыі маладых людзей Гродзенскай дыяцэзіі, асабліва тых, хто ўдзельнічае ў душпастырстве.
Святар адзначыў, што яны і надалей хочуць разам адкрываць свае сэрцы Богу і выходзіць насустрач кожнаму, хто жадае заставацца маладым у душы.
Перад выстаўленым Найсвяцейшым Сакрамэнтам маладыя людзі даверылі свой сённяшні і заўтрашні дзень Богу і падзякавалі за ўсе даброты, атрыманыя з Яго шчодрай Айцоўскай рукі.
