У суботу 1 красавіка ў касцёле Найсвяцейшага Адкупіцеля ў Гродне (Дзевятоўка) адбылася велікапосная сустрэча моладзі з розных парафій горада над Нёманам.
Як паведаміла Прэс-служба Гродзенскай дыяцэзіі, у сустрэчы, якая праходзіла ў парафіі, дзе нясуць служэнне ксяндзы рэдэмптарысты, узялі ўдзел дзясяткі гродзенцаў, якія пажадалі такім чынам распачаць перажыванне Вялікага тыдня.
Сустрэча стала не толькі супольнай малітвай маладых людзей, але таксама нагодай, каб юнакі і дзяўчаты з розных парафій маглі пазнаёміцца паміж сабой.
Напачатку адбылася святая Імша, цэлебрацыю якой узначаліў пробашч парафіі ксёндз Андрэй Ядкоўскі CSsR. Літургію і спеў падрыхтавалі вернікі парафіі-гаспадыні сустрэчы.
З гаміліяй да прысутных звярнуўся адказны за душпастырства моладзі OPEN ксёндз канонік Антоній Грэмза. Святар прапанаваў удзельнікам паразважаць над пытаннем «Ці шчаслівы я з Хрыстом?». Па словах душпастыра моладзі, «хоць чалавек і слабы, і грэшны, мы павінны трымацца Пана, памятаць, што з намі Езус.
Хрыстус памрэ на крыжы асабіста за цябе. Гэта — вялікая ахвяра», — дадаў ксяндз Антоній Грэмза.
Пасля Імшы адбылося набажэнства Крыжовага шляху. Велізарны і цяжкі крыж неслі ад стацыі да стацыі прадстаўнікі розных парафій горада. Напачатку планавалася правесці набажэнства на пляцы перад касцёлам, але з-за непагадзі яно прайшло ў святыні.
Падчас набажэнства вернікі разважалі над Мукай Езуса Хрыста ў супастаўленні са сваім уласным жыццём, думаючы пра тое, што можа надаць яму правільны кірунак і сэнс.
Разважанні, ад якіх у некаторых з удзельнікаў былі на вачах слёзы, чытала ад першай асобы моладзь гродзенскіх парафій. Набажэнства суправаджаў спевам гурт моладзевага душпастырства Гродна OPEN.
Крыжовы шлях з разважаннямі з’яўляецца своеасаблівымі ўводзінамі ў атмасферу Вялікага тыдня і традыцыйна праходзіць увечары ў суботу перад Пальмовай нядзеляй, або нядзеляй Мукі Пана.
Апошнім пунктам сустрэчы стала адарацыя святога Крыжа.
