У нядзелю 15 верасня адбылася пешая пілігрымка з гродзенскай парафіі Святога Духа на Узгорак надзеі ў Капцёўцы (дэканат Гродна-Захад), у санктуарый Маці Божай Яснагорскай, Суцяшальніцы засмучаных.
Як адзначае Прэс-служба Гродзенскай дыяцэзіі, пілігрымка па традыцыі здзяйснялася з нагоды новага навучальнага і катэхетычнага года, каб папрасіць Маці Божую аб благаслаўленні на новы перыяд інтэлектуальнай працы і прынесці Ёй свае інтэнцыі.
У пілігрымцы ўдзельнічала амаль 200 чалавек: дзеці, моладзь і дарослыя, вучні, студэнты і настаўнікі з розных гродзенскіх парафій, а таксама студэнты Міждыяцэзіяльнай вышэйшай духоўнай семінарыі ў Гродне.
Пілігрымка распачалася агульнай малітвай у капліцы парафіі Святога Духа (Альшанка). Пробашч парафіі ксёндз канонік Павел Салабуда благаславіў пілігрымаў у добры і плённы шлях.
У пілігрымцы ўдзельнікі маглі пазнаёміцца паміж сабою, а таксама прыступіць да споведзі, паспяваць песні, якія дапамагалі ім не стаміцца ў дарозе, і памаліцца ў сваіх інтэнцыях.
У Капцёўцы пілігрымаў прывітаў і акрапіў святой вадой кусташ санктуарыя ксёндз Міхал Ластоўскі. У прамоўленай на святой Імшы гаміліі святар засяродзіўся на ролі Нябеснай Маці ў жыцці чалавека ў кантэксце Яе сямі балесцяў.
Напрыканцы літургіі адбылося благаслаўленне школьных прыладаў.
Пасля Імшы ўдзельнікаў пілігрымкі чакалі забавы, абед і танцы.
