22 верасня ў Белай зале мінскага касцёла св. Сымона і св. Алены (Чырвоны касцёл) адкрылася творчая выстава архітэктара Аляксандра Базевіча «Адраджэнне касцёлаў на Беларусі».
Адкрыццё распачалося з малітвы і благаслаўлення, якое ўдзяліў кс. Кірыл Бардонаў. Урачыстую цырымонію адкрыцця аздобіў сваім прыгожым спевам адзін з парафіяльных хораў Чырвонага касцёла Cantus cordis — «Спеў сэрца». У адкрыцці архітэктурнай выставы бралі ўдзел як простыя вернікі, так і прадстаўнікі творчай інтэлігенцыі, у тым ліку пазаштатны фотакарэспандэнт Catholic.by Віктар Ведзень.
Адным з першых наведвальнікаў выставы архітэктара Аляксандра Базевіча ў Чырвоным касцёле стаў кс. прэлат Андрэй Стэцкевіч, які курыруе пытанні аднаўлення і пабудовы новых святыняў у Мінска-Магілёўскай архідыяцэзіі.
Аляксандр Базевіч — аўтар праектаў больш як 150-і аб’ектаў грамадскага прызначэння і культавай архітэктуры ў розных месцах Беларусі, а таксама ў Расіі і Германіі.
Звяртаючыся да гістарычных матываў і стыляў, Аляксандр Базевіч творча асэнсаваў архітэктурныя традыцыі культавых пабудоваў на беларускіх землях і ўвасобіў іх у сваіх праектах.
Яго першай працай у галіне сакральнай архітэктуры стаў праект пабудаванага ў 2001 годзе хрысціянскага адукацыйнага цэнтра імя святога Яна Боско пры касцёле святога Міхала Арханёла ў Смаргоні. Архітэктар таксама з’яўляецца аўтарам праектаў каталіцкіх святыняў у Волме, Клецку, Стоўбцах, Фаніпалі, Мінску (у мікрараёне Лошыца), Смаргоні і іншых месцах нашай краіны.
